“Kryevepra” e Cikalleshit nuk mjafton, Shqipëria dorëzohet përballë Çekisë

Kombëtarja shqiptare e futbollit është mundur 3-1 në transfertë përballë Çekisë, në ndeshjen e dytë miqësore pas asaj me Uellsin.

Golat e fitores vendasit i shënuan gjatë pjesës së dytë, teksa fraksioni i parë i lojës u mbyll në shifrat e barabarta 1-1.

Fillimisht çekët, realizuan golin e avantazhit në minutë e 18-të me anë të sulmuesit të Leverkusen, Schick. Kuqezinjtë u përgjigjen duke barazuar shifrat në fundin e 45 minutave të para, teksa Cikalleshi “shpiku” një gol nga më shumë se 30 metra.

1-1, rezultat me të cilin u mbyll pjesa e parë. Pjesa e dytë nisi me një Shqipëri që nuk po linte hapësira fillimisht, por Çekia ishte e vendosur të shënonte dhe Masopust me një gjuajtje nga jashtë zone mposhti Selmanin.

Sokol Cikalleshi dy minuta më pas rrezikoi portën e vendasve, por nuk shënoi dot për shkak të portierit.

Në fund Çekia realizoi edhe golin e tretë, me një goditje me kokë të Celustka. Bare në fund mund ta ngushtonte rezultatin, por u ndal nga shtylla.

Dy ndeshje miqësore për Shqipërinë në pak ditë, teksa bilanci është një barazim dhe një humbje. Kujtojmë që kuqezinjtë gjatë muajit shtator startojnë kualifikueset e Kupës së Botës së Katarit me 3 sfida ndaj Polonisë, Hungarisë dhe San Marinos përkatësisht më 2, 5 dhe 8 shtator.