Kategoria Superiore ka nisur merkaton dhe lëvizjet e para janë bërë. Dinamo ka hyrë fuqishëm në merkato dhe po synon të sigurojë disa lojtarë. Njëri prej tyre është Patrik Bardhi, i cili përfundoi kontratën me Kastriotin në fund të sezonit pritet të firmosë me një nga klubet e rëndësishme të Superiores.
Bardhi aktivizohet në krahun e djathtë të sulmit dhe ka treguar cilësi të mëdha me krutanët këtë sezon. Për ish-talentin e Tiranës prej kohësh është interesuar edhe Kukësi dhe së fundmi mësohet se edhe Dinamo është vënë pas tij. Dy të lartpërmendurit nuk janë të vetmit sepse për 23-vjeçarin ka interes edhe nga klube të tjera në vendin tonë.
Ndërkohë zhvillime ka edhe te Tirana. Mësohet se bardheblutë duan të heqin dorë nga Tim Vayrynen, finlandezi i ardhur në janar. Ai ka kontratë edhe një sezon me Tiranën, por nuk ka mundur të tregojë asgjë nga vetja e tij që nga ardhja në “Selman Stermasi”.
Mësohet se Tirana i ka kërkuar divorcin me mirëkuptim sulmuesit, duke i ofruar një pjesë të pagës që i ka mbetur në kontratë. Mbetet të shihet nëse finlandezi do të largohet, për t’i hapur rrugë një tjetër lëvizje te bardheblutë, që janë në kërkim të një qendërsulmuesi tipik, që do shoqëronte Taulant Seferin në sulmin e 25 herë kampionëve të Shqipërisë. /abcnews.al
