Nga Boldnews.al
Prokurori i Tiranës, Ervin Karanxha, kërkon reagimin e Këshillit të Lartë të Prokurorisë (KLP) pas asaj që ai e konsideron si “presion i vazhdueshëm për shkak të detyrës” që po ushtrohet ndaj tij në mënyrë të padrejtë nga televizioni “Top Channel” dhe specifikisht drejtori i tij, Ben Blushi.
Në një Memo që mban datën 16 Prill 2021, prokurori Karanxha sqaron në mënyrë të detajuar sulmin që po i bëhet atij personalisht, si edhe familjes së tij, nga televizioni i drejtuar prej Blushit.
“Në datën 30.03.2021, në emisionin “Top Story” i transmetuar në televizionin TOP CHANNEL, është përmendur emri im si prokuror në Prokurorinë e Rrethit Gjyqësor Tiranë, që i sigurojë pa të drejtë personave të tretë klientë të familjes imunitetin apo paprekshmërinë ndaj ndonjë krimi…”, shkruan ndër të tjera prokurori Karanxha në kërkesën për reagim drejtuar Këshillit të Lartë të Prokurorisë.
Kjo situatë ka vijuar edhë më tej;
“Televizioni Top Channel, në datën 31.03.2021 me të njëjtën përmbajtje, e ka transmetuar përsëri si lajm emisionin Top Story, në edicionin e lajmeve të datës 31.03.2021.
Në datën 13.04.2021, ora 21:11 është botuar përsëri si shkrim nga Top Channel “Tre Karanxhat e sistemit të drejtësisë”.
Në datën 14.04.2021, në edicionin e lajmeve TOP CHANNEL është transmetuar përsëri një kronikë si lajm me titull “Prokurori Karanxha drejt shkarkimit?! Për milionat e mbajtura në shtëpi, Vettingu shkarkoi bashkëshorten”, informon Karanxha Këshillin e Lartë të Prokurorisë.
Pasi bën një renditje të atyre që i konsideron si “sulm për shkak të detyrës”, prokurori i Tiranës i bën të ditur Këshillit të Lartë të Prokurorisë, “se këto kronika transmetohen nga televizioni TOP CHANNEL në kuadër të ushtrimit të profesionit tim si prokuror pranë Prokurorisë së Rrethit Gjyqësor Tiranë”.
Sipas Karanxhës, “Në këtë televizion është i punësuar si Drejtor i Përgjithshëm i TOP CHANNEL politikani dhe ish deputeti Ben Blushi, i cili pas largimit nga Partia Socialiste krijoi partinë “Libra” dhe pasi nuk mori asnjë vend si deputet në Kuvendin e Shqipërisë u emërua Drejtor i Përgjithshëm i TOP CHANNEL. Këtë televizion ai e përdor për qëllime të tij personale për të sulmuar anëtarët e sistemit të Drejtësisë të cilët përballen çdo ditë me krimin, me çështje sensitive për opinionin publik”.
Sipas prokurorit, “Drejtori i Përgjithshëm i shoqërisë TOP CHANNEL, nëpërmjet programeve televizive të televizionit TOP CHANNEL synon përhapjen e lajmeve të rreme ndaj meje si prokuror dhe ndaj familjarëve të mi me qëllim për të ulur dinjitetin tim dhe të familjes për arsye politike dhe personale të tij”.
Duke deklaruar se ky sulm publik ndaj tij cënon pavarësinë dhe integritetin e prokurorit të Republikës, z. Karanxha kërkon reagim nga Këshilli i Lartë i Prokurorisë “në lidhje me këtë presion të padrejtë politik të ushtruar ndaj meje dhe të afërmve të mi në kohën e fushatës zgjedhore nga Televizioni “TOP CHANNEL”.
