Kandidati i pavarur në Qarkun e Dibrës, Elton Debreshi është gjobitur me 5 milionë lekë të reja gjobë për shkelje të rregullave kundër COVID-19.
Në fletën e gjobës, thuhet se Debreshi kundër masave anti-COVID zhvilloi takime elektorale.
Kandidati i pavarur akuzon Kryeministrin Edi Rama për gjobën, duke thënë se ai dhe PD janë bashkë kundër tij për shkak të mbështetjes që ka në këto zgjedhje.
“50 milione lekë gjobë. Sot komisariati i Bulqizës më njoftoi se jam gjobitur me 5,000,000 lekë të reja për shkak të tubimit të datës 26 mars. Për shkak të vendimit të Gjykatës Kushtetuese dhe mosbotimit të rregullave të reja në fletoren zyrtare, takimi në Bulqizë ka qenë krejt i ligjshëm.
Autori i vërtetë i kësaj gjobe është Edi Rama. Ai dhe partitë e tjera kanë frikë nga mbështetja e madhe që po marrim në çdo fshat dhe qytet të Dibres. Fakti që për të njejtat tubime PD nuk gjobitet, tregon se të gjitha partitë janë bashkë.
Dje ishin bashkë kundër grevës dhe protestave tona, sot janë bashkë kundër kandidimit të një minatori. Mua nuk më frikëson një gjobe.
Nuk i frikëson as mijëra minatorët dhe qytetarët që po na japin besën kudo. Kjo copë letër do të hyjë në historinë e turpit të kësaj qeverie”, shkruan minatori që kandidon për deputet.
