Çudirat nga kampi i Rilindjes nuk mungojnë as në këto kohë fushate elektorale. Thagma më e freskët vjen nga ministri i Rindërtimit, Arben Ahmetaj.
Këtë të Hënë, ai është prezantuar si kandidat për deputet në njësinë katër në kryeqytet.
Deri këtu, asnjë e jashtëzakonshme, deri në momentin që përmes faqes zyrtare të ministrit në rrjetin social FB, i bëhet jehonë takimit elektoral dhe në komentin që shoqëron pamjet e takimit, Arben Ahmetaj falenderon …veten. Po, e saktë!
“Faleminderit Arben Ahmetaj për gjithë punën e jashtëzakonshme me rindërtimin pas tërmetit – shumë krenar për transformimin e Njësisë 4”, shkruan Arben Ahmetaj për Arben Ahemtajn.
Ndoshta ministri ka tentuar të imitojë “Snoop Dogg” kur mori një yll në bulevardin e Hollivudit, me reperin që falënderonte veten, në atë që është cilësuar si një ndër fjalimet më të çuditshme të të gjitha kohërave. Ose ndoshta, një lapsus.
Gjithsesi, ministri është penduar dhe ka zhdukur nga FB falënderimet për veten, siç tregojnë gjurmët e mbetura në rrjetin social.
Pak ditë më parë, deputeti socialist Florenc Spaho, i gjashti në listën e PS-së në qarkun e Elbasanit, publikoi padashur mes rreshtave të një sttausi në FB, një mesazh ku urdhërohej të “falënderonte kolegët ose ndonjë tjetër”.
