“Janë yje gjigantë këta”, trajneri i Lushnjes shpërthen ndaj lojtarëve të tij: Mendonin se Flamurtari mundej vetë

Trajneri i Lushnjes, Ilir Gjyla është shprehur i pakënaqur pas ndeshjes me vlonjatët. Trajneri e ka me lojtarët, ndërsa për gazetën tha:

“Futbollistët e mi mendonin se Flamurtari mundej vetë, janë ‘yje’ e ‘gjigantë’ këta. Kështu e pësuan. Është vazhdimësia e asaj që kam thënë: nuk janë fare në fushë. Madje, ka nga ata që duhen përjashtuar urgjentisht. Por, këtë vit kështu e ngritëm këtë punë, kështu do ta vazhdojmë deri në fund. Do ta mbyllim kampionatin me këta, ndonëse duhen marrë masa patjetër. Pretendojnë të luajnë, si Mikel Bregu p.sh, por nuk bëjnë gjë. Të rinjtë i kemi marrë nga e keqja. Duam t’i bëjmë, mirëpo urdhëro si luajnë. As dinë të pasojnë, as dinë të krosojnë, as dinë të stopojnë, as dinë të mbyllen.

Nuk dinë të bëjnë asgjë. Kështu që, është fat i mirë që i provojmë në këtë mënyrë. Ta dinë, ta shikojnë veten ku janë. Do të mbarojë kampionati dhe do të flasim për atë çfarë do të bëjmë për vitin tjetër. Kështu si e kanë nisur, të mbarojnë me sukses këtë kampionat. Kështu nuk mund të vazhdohet.

Rastet e humbura? Nuk mundet që sulmuesi të jetë përballë me portën dhe të kthehet prapa për ta gjuajtur me këmbën e majtë. Tangërllëku i disa futbollistëve, jo i të gjithëve, sepse ka nga ata që japin maksimumin, më duket i pavend. Tangërllëk është vetëm kur fiton”, tha tekniku i Lushnjës.

LEXO EDHE  Ervis Bici shpallet kampion Europe në “Muay Thai”, premion e majme e jep për bamirësi