Kryeministri Edi Rama u shpreh sot në emisionin Open se Lulzim Basha nuk është lider i opozitës, pasi ai nuk ka reaguar ndaj deklaratave dhe thirrjeve të ish-kryeministrit Sali Berisha lidhur me vaksinat kineze.
Duke bërë diversione lidhur me atë se kush e drejton opozitën, Rama tha se “Sali Berisha mund t’a nxjerrë nga selia Lulzim Bashën me një status në facebook, pa dalë fare nga shtëpia”.
“Berisha bëri thirrje kriminale, kundër vaksinave, kundër vaksinimit, ndërsa Lulzim Basha bën sikur nuk dëgjon. Sikur deklaratat t’i bënte Nard Ndoka, edhe mund të mos reagohej se mund të konsideroheshin si shaka. Por thirrjet i ka bërë Sali Berisha, i cili nëse me një postim në Facebook thotë të largohet Lulzim Basha, atëherë, Basha ikën nga selia të nesërmen”, tha Rama, duke vijuar diversionet.
Kryeministri u shfaq i nervozuar në emisionin Open, duke vijuar akuzat ndaj opoitës, ndërsa Bashën e krahasoi me Gjinon.
“Basha flet njëlloj sikur jemi në 1992, 2005, 2009 apo 2017. Nuk thotë asnjë fjalë për vaksinat, as për tërmetin. Ky është në autobus. Nuk i kanë fare në panoramë dy problemet madhore, rindërtimin dhe vaksinimin”, tha Rama.
