“Ujë i pijshëm në Tiranë!”, Lali Eri bën tender 20 mijë euro për ujë në zyrat e Bashkisë

Nga Boldnews.al

Një nga premtimet e hershmë të politikanëve në Shqipëri ka qenë “24 orë ujë të pijshëm”. Partia Socialiste, megjithëse po bën plot 8 vite në pushtet, ka sërish këtë premtim për zgjedhjet e 25 prillit. Për 30 vite, të dyja krahët e politikanës kanë bërë të njëjta premtime, rrogë, ujë, drita, rrugë.

Dhe, kur jemi mbushur plot me gënjeshtra, vijojmë të paguajmë disa herë ujin për shtëpitë tona. Familjet e kryeqytetit paguajnë ujin që nuk pihet në çesma. Paguajnë ujë për gatim si dhe ujin për të pirë. Dhe, nëse do t’i mbledhim bashkë faturat, mund të shkojnë deri në 50 euro në muaj.

Një nga politikanët që e ka bërë këtë premtim, por edhe ka deklaruar se “uji në çesmat e Tiranës është i pijshëm” ka qenë kryetari i Bashkisë së Tiranës. Lali Eri ka shpenzuar dhjetëra milionë euro për investime në Ujësjellësa, por deri më tani asnjë lagje në kryeqytet nuk pi ujë të pijshëm. Edhe lagjet që e pinin ujin nga rubinetat Ali Demi, Qyteti Studenti apo Selita, aktualisht nuk e përdorin, si pasojë e amortizimeve të rrjetit. Por, a e dini se vetë Lali Eri, apo vartësit e tij nuk pijnë ujë në çesma?!

Bashkia Tiranë, 20 mijë euro për ujë të pijshëm

Sipas dokumenteve që disponon “BoldNews”, Bashkia e Tiranës ka hapur një tënder me procedurën “Kërkesë për propozim”, me numër REF-91336-03-26-2021. Objekti i tenderit është “blerje ujë i pijshëm”, për punonjësit e Bashkisë së Tiranës për vitin 2021”. Fondi për këtë tender është 2.249.925 lekë pa TVSH (Me TVSH mbi 20 mijë euro). “Malli duhet të dorëzohet në Bashkinë e Tiranës, nga data e lidhjes së kontratës deri në datë 31 dhjetor 2021, sipas nevojave dhe kërkesave të Autoritetit Kontraktor. Afati kohor për dorëzimin e ofertave ose kërkesave për pjesëmarrje është në datën 08 prill 2021 në orën 12.30” thuhet në dokumentet e këtij tenderi.

LEXO EDHE  U kapën me dr*gë në makinë, dy të arrestuar dhe dy në kërkim

Dokumentet: Ujë i pijshëm me analiza kimike

Nëse qytetarët konsumojnë ujë rubineti, uji për zyrtarët e Bashkisë së Tiranës duhet të jetë me analiza kimike. “Uji mineral të jetë natyral i pasuruar me karbon dhe magnezi i distiluar nga të gjitha bakteret me analiza bakteriologjike nga ISHP dhe analiza fiziko kimike lëshuar nga AKU. Të jetë i certifikuar sipas standardeve ISO 9001-2015, ISO 22000-2018, ISO 14001-2015.

Cilësia, garancia dhe furnizimi me aparate të ujit të sigurohet nga operatori ekonomik, sipas kërkesave të Autoritetit Kontraktor” thuhet në dokumentet e siguruara nga BoldNews.

Më tej sqarohet se një shishe uji duhet të jetë në ambalazh 19 litra për përdorim në aparatet e ujit. “Operatori duhet të ofrojë shërbim të garantuar brenda orarit zyrtar për furnizimin periodik me ujë. Operatori duhet të ketë përfaqësi në Tiranë për shërbim të shpejtë, sipas nevojave të Autoritetit Kontraktor. Gotat plastike të jenë 250 ml, e kthjellët, e lehtë dhe e fortë për përdorim të sigurt. Secili produkt duhet të ketë të përcaktuar/ stampuar në ambalazhin/ etiketën e mallit përkatës afatin e skadencës (minimalisht një vit nga data e lidhjes së Kontratës)” thuhet në këto dokumente. Në to thuhet se kërkohet 101 pako me gota plastike, ku 1 pako të jetë 100 copë gota. kërkohet edhe 5385 shishe me ujë 19 litra.