Qeveria shqiptare do të paguajë 10 milionë dollarë për vaksinat kineze.
Dje në Tiranë mbërritën nga distributori në Turqi 192.000 dozat e para të “Sinovac”, ndërsa më pas pritet që të vijë edhe pjesa tjetër që është firmosur në marrëveshjen mes Shqipërisë dhe kompanisë.
Edi Rama paralajmëroi për një vaksinim masiv të popullsisë duke u shprehur se deri në fund të muajit qershor do të jenë vaksinuar 500 mijë qytetarë.
Çështja e vaksinave kineze është fakti se ato nuk janë çertifikuar nga OBSH, EMA apo FDA, ndërsa Rama u shpreh se janë vaksinuar rreth 17 milionë turq si dhe familjet mbretërore arabe.
Fillimisht Kryeministri fliste për suksesin me kompaninë Pfizer, duke premtuar rreth 500 mijë doza. Më pas foli me superlativa për AstraZeneca. Një sasi vaksinash ruse janë dhuruar nga Princi i Kurorës së Emirateve të Bashkuara, ndërkohë që dje kanë ardhur edhe vaksinat kineze.
Në total, referuar deklaratave të Kryeministrit, në territorin shqiptar janë rreth 280 mijë doza vaksinash, prej të cilave 192 mijë janë kineze.
