Nënkryetari i PD, Edi Paloka, i cili është drejtues politik i kësaj partie në qarkun e Durrësit, u shpreh sot gjatë një takimi me banorë në Gramëz të Krujës se pronarët e shtëpive të dëmtuara nga tërmeti nuk kanë pse sorollaten nga shteti, i cili duhet t´i japë lekë në dorë atyre.
“Nuk është hera e parë që unë jam këtu dhe dikush më pyeti nëse ka ndryshuar diçka nga fusha këtu në Gramëz. Fatkeqësisht as nga fusha, as nga Shqipëria nuk ka ndryshuar gjë për mirë, jemi në vend-numëro për ekonominë, shëndetësinë, arsimin dhe gjithçka. Madje ka vende ku kemi bërë dhe prapa”, tha Paloka.
Varfëria dhe emigrimi janë shqetësimet kryesore gjatë viteve të fundit. Këto Paloka i quajti si një betejë të shqiptarëve, ndërkohë që beteja e qeverisë Rama është që vetëm të pasurohet.
“E nisëm në ’90 si vendi më i varfër i Bashkimit Europian, tabu të cilën e thyem gjatë qeverisjes së Partisë Demokratike. Ndërkohe sot jemi kthyer po aty, shqiptarët po largohen njëlloj si në vitin ’91. 25 prilli është ditë vendimtare për ne. kjo për shqiptarët është betejë për të mos na ikur fëmijët, ndërsa këta e kanë betejë për të shtuar milionat”, tha ai.
Sakaq Paloka ironizoi qeverinë, me faktin që opozita është aq konstruktive sa i tregon qeverisë se çfarë duhet të bëjë. Gjithashtu nuk mbetet pas as identifikimi i vendit me krimin ne mediat e huaja, gjë për të cilën Paloka theksoi se ka vende të cilat duan të rikthejnë vizat me Shqipërinë vetëm për këtë arsye.
