KQZ ka regjistruar Tom Doshin si kandidat për deputet në zgjedhjet e 25 prillit. Vendimi është marrë nga KQZ pavarësisht apelit të ambasadores amerikane Yuri Kim, e cila ka kërkuar mosregjistrimin e kandidatëve që përfshihen në listat e zeza të DASH-it, sikundër është edhe emri i deputetit Doshi.
Doshi njihet si Kryetar i PSD, pavarësisht se kërkesën në KQZ të depozituar nga kjo parti e ka firmosur Engjëll Bejtaj, i cili sipas sqarimeve është krye të kësaj partie në pritje të zbardhjes së dokumenteve nga gjykata.
Kim pak javë më parë zhvilloi edhe një takim me Kryekomisionerin Ilirjan Celibashi, i cili u shpreh se do të angazhohej në procesin e mosregjistrimit të kandidatëve problematikë, ku përfshihet edhe Tom Doshi, sipas diplomates amerikane.
Por duket se Cellibashi nuk ka mundur të mbajë “premtimin”. Tom Doshi pritet të kandidojë për zgjedhjet e 25 prillit në qarqet Tiranë dhe Shkodër, ndërsa nuk dihet nëse diplomatja amerikane do të angazhohet më publikisht duke i kërkuar zgjedhësve të mos votojnë kandidatë që kanë probleme me ligjin apo janë në listat e zeza të DASH.
Në mbledhjen e sotme, KQZ deklaroi se asnjë prej kandidatëve për deputetë të PSD nuk ka deklaruar të dhëna që përbëjnë kusht për mosregjistrimin e tyre.
Ndërkohë nga përfaqësuesi i PD në KQZ, Ivi Kaso, tha se ky është rast i pastër ku dëbimi konsiderohet me burgim dhe sipas tij duhej të merrej në konsideratë kërkesa e SHBA.
“Është rast i pastër kur kandidati ka një vendim të barazuar me dëbimin. Shumë vende vendosin dëbimin në vend të burgimit. Konsiderohet i barasvlershëm. Qëndrimet e përfaqësive diplomatike të vendeve që kanë aplikuar këtë lloj mase, duhet të merren në konsideratë nga KQZ”, tha Kaso.
Por, Celibashi është shprehur se për të gjitha këto raste që ka indicie të tjera publike, KQZ do të bëjë verifikim të thelluar si dhe do t’i kërkohet Prokurorit të Përgjithshëm që të japë informacione dhe të dhëna shtesë.
Ajo që dihet është se Doshi ka kaluar pengesën e parë atë të regjistrimit si kandidat, dhe nëse merr mandatin e deputetit, do të shihet nëse ai do të ketë një rol deciziv me votën e tij për krijimin e Qeverisë.
Doshi ka mbajtur një qëndrim pro Qeverisë Rama dhe nismave të saj në Parlament, njihet si një nga mbështetësit kryesorë të Edi Ramës, pavarësisht momenteve të tensionit të pak viteve më parë mes tij dhe Kryeministrit.
