KLGJ dhe KLP kanë reaguar përmes deklaratave zyrtare lidhur me shpërthimin e automjetit të prokurorit Arjan Muçaj, bashkëshortja e të cilit është gjyqtarja Gentiana Muçaj.
Ngjarja ndodhi mbrëmjen e djeshme në Tiranë.
KLP e konsideron sulmin si një atentat terrorist ndaj sistemit të drejtësisë dhe rendit juridik. KLP thekson se prokurorit Muça dhe familjes së tij do t´i sigurohet mbrojtje e posaçme.
KLGJ dënon aktin kriminal, vendosjen e bombës në makinën e prokurorit Arjan Muçaj, që përdorej edhe nga gruaja e tij, gjyqtare në Administrativen e Tiranës, Gentiana Muçaj. KLGJ thekson se akte të tilla përbëjnë kërcënim serioz jo vetëm për gjyqtarët, por ndaj të gjithë sistemit të drejtësisë.
“Këshilli i Lartë Gjyqësor shpreh shqetësimin e thellë në lidhje me aktin kriminal të datës 11.3.2021 ndaj anëtarëve të familjes së gjyqtares Gentiana Muçaj dhe dënon me forcë çdo akt që cenon sigurinë e gjyqtarëve. Akte të tilla të përbëjnë kërcënim serioz jo vetëm për gjyqtarët, por ndaj të gjithë sistemit të drejtësisë e idealeve themelore të një shoqërie të hapur dhe shtetit të së drejtës.
Këshilli i Lartë Gjyqësor i shpreh mbështetjen e palëkundur familjes Muçaj dhe të gjithë anëtarëve të personelit të sistemit gjyqësor për të garantuar sigurinë e tyre, në mënyrë që të jetojnë e të ushtrojnë detyrën pa frikën e kërcënimeve nga armiqtë e drejtësisë.
Këshilli i Lartë Gjyqësor është i gatshëm të bashkëpunojë ngushtë me agjencitë ligjzbatuese për zbulimin e autorëve të akteve të tilla kriminale, me qëllim ndëshkimin e tyre dhe parandalimin e ngjarjeve të tilla të rënda” mbyllet deklarata.
