Lëvizja Vetëvendosje në Shqipëri, ka reaguar në lidhje me sulmin që u bë ditën e sotme, në zyrat e FRD-së, ku dhe Presidenti Ilir Meta pati përplasje me policinë bashkiake.
Në një postim në rrjetet sociale, kreu i VV-së, Boiken Abazi, teksa ka renditur disa ngjarje me FRD, e cila bëri koalicion me PD-në me 3 mars, shkruan se FRD është një parti që duhet mbrojtur. Ai thekson se Rama do të prodhojë çdo ditë nga një skandal anësor, që të mos lejojë vëmendjen për skandalin e shëndetesisë dhe mospërmbushjen e premtimeve nga fushatat e kaluara.
POSTIMI I PLOTË
Mbi ngjarjet e sotme në selinë e partisë “Fryma e Re Demokratike” në Tiranë:
Më 24 shkurt FRD bëri koalicion me Partinë Demokratike.
Më 3 mars Bashkia e Tiranës çoi shkresën pa firmë e vulë për lirimin e ambientit të selisë së FRD. Bashkia e Tiranës u kujtua ta çonte këtë shkresë pasi FRD nuk ishte më e përdorshme për Partinë Socialiste.
Rama do të prodhojë çdo ditë nga një skandal anësor, që të mos lejojë vëmendjen për skandalin e shëndetesisë dhe mospërmbushjen e premtimeve nga fushatat e kaluara.
Veliaj synon realizimin e projektit për kullat me Fushën, dhe përfiton nga koha parazgjedhore dhe Covid-i për të shmangur reagimin qytetar ndaj kullizimit të qendrës së kryeqytetit.
Demokracia ështe lënë në plan të fundit, dhe qeveria e bashkia po e shkelin pa teklif. Dalja e FRD-së prej ombrellës së PS, e bëri atë menjëherë të sakrifikueshme. Kur je me PS mbrohesh dhe përfiton trajtim më të butë, kushdoqofsh. Kur je jashtë, më të ashpër.
Nuk shtrohet pyetja a është FRD një parti që duhet mbrojtur. Çështja duhet trajtuar e mbrojtur në parim, në mënyrë që të kundërshtohet një regjim që vepron me arbitraritet të kulluar ndaj çdokujt që i cenon jetëgjatësinë.
