Nga Boldnews.al
Nëse do e kthentë kohën pas, në momentin që ishte një “Begs qumështor”, me siguri që nuk do të zgjidhte degën e këmbësorisë, por atë të lëndëve kimike. Dikur do i duhej ky “profil”, sepse gjenerali që vendosi spatetat në kasafortën e Rilindjes, Sandër Lleshaj, fill pasi veshi kostumin e qepur nga Rama për ministër të Brendshëm, do të mbahet mend gjatë për atë që i bëri Tiranës gjatë protestave 2019-2020.
Ende shumë qytetarë i kap paniku kur përmendet fjala protestë, sepse mushkëritë iu mbushën me gaz lotsjellës, deri edhe brenda banesave. Po sot mbrojtësi më i zjarrtë i pushtetit të Ramës nuk dihet se ku është. U shtrydh, u këqpërdor dhe në fund u hodh në rrugë të madhe, pa i ofruar as edhe një benefit të vogël për shërbimin e madh që i bëri pushtetit…
Ramës për aq gjë iu desh. Të shtypte protestat e opozitës përgjatë vitit 2019 dhe të shkatërronte po nën gazin lotsjellës banesat e qytetarëve në Unazën e Re dhe në Bregun e Lumit. Fatkeqësisht pasi kishte zbrazur magazinat e gazit lotsjellës të blerë në Serbi, u desh shkrehja e kobures së një efektivi të repartit shqiponja që i mori jetën 25-vjeçarit të pafajshëm Klodjan Rasha që Rama me një “plumb” të vriste “dy zogj”: Të shkarkonte Lleshajn dhe shuante mllefin qytetar që u derdh në rrugët e Tiranës në protesta masive.
Nëse sot është e vështirë të gjesh Lleshajn aktiv në jetën politike dhe qytetare, ajo që ka lënë pas është histori e bollshme për të shkruar edhe libra. Opozita nisi protestat pas djegies së mandateve duke kërkuar largimin e Ramës dhe mbajtjen e zgjedhjeve të parakohëshme.
Metoda për të zbrazur sheshet e mbushura plot me protestues, që i lëkundën leqet e këmbëve kryeministrit u “zbulua” nga ministri Lleshaj dhe kryepolici Ardi Veliu. Hedhja e bombave me gaz lotsjellës mbi qytetarët paqësorë dhe më pas shkopinjtë e gomës në kryet e tyre ishin forma e dhunshme që përdori pushteti.
E quajtën sukses këtë metodë dhe u mbushën sërish magazinat me gaz lotsjellës sepse do i duheshin për çdo “revoltë” që vinte nga qytetarët. Kulmi u arrit tek pesë banesa të disa banorë në zonën e Bregut të Lumit në Tiranë, në momentin që bashkia e Lali Erit u kishte dërguar rruspat shkatërruese për ndërtimin e Bulevardit të Ri.
Pa u zbardhur dita, mbi shtëpitë e projektuara për tu shkatërruar u zbraz gazi lotsjellës. Të moshuar, fëmijë të mitur, madje edhe një grua shtazënë u gjendën nën gazin kimik. Dolën të traumatizuar dhe disa prej tyre ndalën në Spitalin Ushtarak me frymën e përgjysmuar. Kur u kthyen për në bazesë panë që atë ngrehinë ku kishin lënë djersën e kishin rrafshuar me tokë. Pak u fol për këtë ngjarje, sepse ndodhi natën dhe nën “mjergullën” e gazit e dyshes së gjeneralëve…
Edhe në zonën e Unazës së Re u ndoq e njëjta formë, hidh gaz e çaj përpara me fadromat shkatërrimtare. Për herë të fundit gazi lotsjellës është përdorur një ditë pas Lleshaj u detyrua të jepte dorëheqjen, duke pranuar edhe fyrjet e kryeministrit Rama sepse i prishi pushimet që po bënte në Amerikë.
Mes Ramës dhe Lleshaj tre muaj para se të largohej i hequr me “dorëheqje”, ishte dërguar si drejtues politik i PS-së në Qarkun Lezhë. Aty kishte ustallarë të vjetër që lundrojnë mes krimit të organizuar dhe pushtetit lokal. E nxorrën jashtë formacionit gjeneralin i cili në fillim pandehu se gëzonte mbështetjen e Ramës. Në Lezhë iu shkrua edhe fati i tij politik dhe pritej vetëm momenti që të “keqpërdorurin” ta flaknin përgjithnjë.
Gjenerali u bë ushtar i Rilindjes dhe ushtari u kthye me “barutin e lagur” në shtëpi… Nuk do të shihet më në jetën aktive politike, sepse Rilindja që e promovoi, e “varrosi” për ti lënë pas vetëm aromën e rëndë dhe tymin asfiksues të gazit lotsjellës.
