Prej vitesh Policia e Shtetit po vepron si një strukturë politike e Rilindjes, ndërsa Ardi Veliu po luan rolin e një komisari politik.
Pak orë pasi qytetarë të Kavajës i rezervuan një pritje surprizë kreut demokrat Lulzim Basha, ka ardhur edhe reagimi i Policisë së drejtuar nga Veliu, i cili paralajmëron penalitete me gjoba ndaj atyre që do të shkelin rregullat anti-Covid.
Pyetja që shtrohet është: a do të mundet policia e Ard Veliut të ndalojë qindra qytetarë që të nëpërkëmbur e dhunuar nga një pushtet arrogant, përfshi këtu edhe strukturën politike të uniformave blu, që të shprehin revoltën e tyre duke marrë pjesë në takime masive?
Përmes një njoftimi, policia shpreh shqetësim për thyerjen flagrante të rregullave anticovid në grumbullimin e disa njerëzve nga ana e një subjekti politik.
“Deri kur rregullat në fuqi do ta ndalojnë grumbullimi e mbi 10 personave, Policia e Shtetit është e detyruar të penalizojë shkelësit.
Por, njëkohësisht duke mos dashur në asnjë mënyrë të hapim shtigje për keqinterpretime, u kërkojmë subjekteve politike bashkëpunim dhe mirëkuptim. Në të kundërt penalizimet me gjobat përkatëse do të jenë të pashmangshme”, thuhet në reagimin e Policisë së drejtuar nga Veliu.
Në fakt nuk kanë qenë të pakta rastet kur nga Rilindja e drejtuar nga Edi Rama janë thyer e shkelur rregullat anti-Covid, ndërsa policia kurrë nuk ka reaguar dhe aq më shumë të paralajmërojë për penalitete.
