Presidenti Ilir Meta tha mbrëmjen e sotme se nëse do të kishte reformë në drejtësi, i pari që duhet të shkonte në burg është ish-kreu i KED-së, Ardian Dvorani.
“Përveç zotit Rama, dhe nja dy tre të tjerë që duhet të justifikojnë lekët që kanë hedhur këtu, nuk besoj se ka njeri tjetër që beson se ka reformë në drejtësi. Po të funksiononte reforma në drejtësi, i pari në burg duhet të ishte Ardian Dvorani. E keni raportin e Venecias se çfarë ka bërë Ardian Dvorani. E dyta duhet të ishte Ministrja e Drejtësisë që falsifikoi vendimet e KED-së, për t’i rrëmbyer presidentit kompetencat. Reforma në drejtësi është ajo që u betua tek ura e Lanës”, thekson Meta.
Për kreun e shtetit, personi që rrezikon sigurinë kombëtare është Edi Rama. “Ilir Meta, e ka gjetur personin që rrezikon Sigurinë Kombëtare të Shqipërisë. Ai është Edi Rama, të tjerët janë derivate. E kam paralajmëruar të ketë kujdes, sepse zgjedhjet që po vijnë dhe janë të rëndësishme për integritetin, demokracinë. Është çështje që prek Sigurinë Kombëtare, dhe interesave Kombëtare për 100 vitet e ardhshme”,- tha Rama.
Duke u ndalur tek zgjedhjet e përgjithshme të 25 prillit, Presidenti Meta thekon se ato janë një moment historik për të ndryshuar degradimin e shtetit shqiptar.
“Zgjedhjet e 25 prillit, unë nuk i shikoj si një betejë mes Ramës, Bashës dhe Kryemadhit, por si një moment historik për të ndryshuar degradimin e shtetit shqiptar. Ne duhet të kemi një rivendosje të demokracisë, te balancës, të shtetit të së drejtës dhe të funksionimit të institucioneve, nëpërmjet rivendosjes së sistemit demokratik. Të hysh në një garë zgjedhore të tillë, do të thotë të hysh në një lojë te pandershme. Të nënvlerësosh faktorin kryesor që është faktori i brendshëm, është e pandershme. Nëse ti ikën nga Parlamenti dhe nëse ti ke një arsye të drejtë, e ke të vështirë që ta kesh përkrahjen ndërkombëtare. Ti duhet të ishe futur në zgjedhjet lokale, ti kishe fituar ato. Në këtë mënyrë tregoje që ai Parlament ishte FAKE. Shqiptarët të vendosin në 25 prill”,- tha kreu i shtetit në një intervistë për emisionin “Të Paekspozuarit”.
