Listat e kandidatëve për deputet, që u depozituan në KQZ mesnatën e 8 marsit, duket se kanë krijuar pakënaqësi dhe probleme.
Nga raportimet mësohet se kandidatët e miratuar nga Kryesia dhe Këshilli Kombëtar i PD duket se nuk janë mirëpritur nga drejtuesi politik për Qarkun e Vlorës, Bujar Leskaj, i cili kryeson edhe listën e kandidatëve për deputet.
Mësohet se probleme janë krijuar edhe me kryetarin e degës së kësaj partie Genc Deromemaj, i cili është lënë jashtë listës së kandidatëve, ndërsa ka prodhuar debate të forta në kryesinë e degës.
Nga burime të degës së PD në Vlorë mësohet se pakënqësia kryesore e shprehur nga Leskaj ka qenë fakti se në listë nuk përfshihet kreu i degës, ndërsa mungojnë burimet njerëzore për të bërë fushatën.
“Me cilët do e bëjmë fushatën”, mësohet të jetë shprehur Leskaj, gjatë një mbledhjeje.
Raportohet se drejtuesi i degës ka artikuluar dorëheqjen nga funksionet partiake, sikundër edhe Leskaj nga kandidimi.
Zyrtarisht Partia Demokratike mohon përplasjet në këtë degë, edhe pse raportohet se drejt qytetit në jug të vendit ka udhëtuar edhe Agron Kuliçaj.
