Sezoni i Partizanit dhe lufta për titull, rrëfehet Ilir Daja: Vllaznia surpriza e këtij kampionati, Asani? Askush nuk donte që të largohej

Partizani mori një barazim zhgënjyes 1-1 në transfertë ndaj Apolonisë. Një hap fals nga të kuqtë që lanë dy pikë shumë të rëndësishme e tashmë janë në vendin e 4 me 39 pikë, dy pikë më pak se Vllaznia kryesuese.

Në një intervistë për “RTSH Sport”, trajneri Ilir Daja ka folur për sezonin e Partizanit, qëndrimin e Jasir Asanit si dhe garën për titullin kampion që do të luhet mes 4 ekipeve.

“Në fillimi askush nuk e quante Partizanin pretendente ndërsa tani kemi rritur pritshmëritë dhe jemi mes favoritëve. Merkato e janarit nuk të jep shumë alternativa, por kemi afruar lojtarë si Ferhan Hasani, por mangësia e lojës prej disa muajsh ka bërë që ai të ketë një stërvitje të diferencuar. Çinari dhe Murataj janë dy lojtarë që janë aktivizuar nga kjo merkato janari. Ajo që është kryesorja është që I gjithë grupi së bashku i kanë ndryshuar fytyrën e Partizanit”.

Jasir Asani? “Ne për çdo gjë punojmë në staf dhe I marrim vendimet bashkë. Kam një peshë në vendimet teknike, por unë kam një staf që punoj. Duke parë që edhe drejtori qëndron afër, qëndrimi i Asanit ishte dëshira e të gjithëve. Ai është një lojtar që kampionatit shqiptar I jep një tjetër bukuri”.

4 ekipe për titull? “Kjo vjen pasi nuk ka shumë diferenca të mëdha. Ne e kemi provuar edhe javën e fundit me Apoloninë që kemi barazuar dy herë, ndërsa me ekipet e forta kemi marrë rezultate të mira. Është gjë e mirë pasi deri në momentin që ekipit nuk kanë arritur objektivat e tyre do të luftojnë deri në fund dhe evitohen aleancat.

Nuk merrem me kundërshtarët dhe të gjithë duhen respektuar. Ne fokusohemi te loja jonë dhe duam ta përmirësojmë atë që t’i lëmë pak hapësira kundërshtarëve dhe ai i radhës është më i rëndësishme për mua. Surpriza më e madhe këtë sezon është Vllaznia, pasi Laçi e ka pasur skuadrën. Vllaznia i surprizoi të gjithë pasi sezonin e kaluar ishte në “Play Out”, ndërsa këtë vit ka bërë ndeshje shumë të mira dhe është në vend të parë me meritë”.