Zbardhen të tjera detaje nga vrasja e 31-vjeçarit Tauland Gjikaj (Beqiraj, Manaj), ditën e djeshme në Vlorë. Dyshohet se shkak i vrasjes të ketë qenë një borxh që viktima iu ka pasur autorëve.
Dje, 31-vjeçari Gjikaj ka kërkuar një shumë parash dhe ka marrë borxh diku, si dhe ka komunikuar në telefon me autorët. Tabulatet telefonike faktojnë bisedat e zhvilluara mëngjesin e djeshëm mes viktimës dhe autorëve, të cilat kanë qenë të ashpra, me debate dhe ofendime.
Ata kanë qenë miq dhe shokë me njëri-tjetrin, kanë qenë të njohur, ndaj dhe 31-vjeçari ka ndaluar, në momentin që ata i kanë dalë para në rrugë.
Ngjarja kriminale ka ndodhur në një zonë mjaft të populluar, pranë Gjykatës së Apelit dhe një kopshti, ku lëvizjet e njerëzve kanë qenë të shumta.
Mendohet se autorët kanë dashur vetëm ta trembim viktimën, pasi nuk ishte një vrasje e paramenduar. Për këtë arsye, autorët nuk kanë qenë të maskuar, si dhe mjeti ka qenë me targa të rregullta dhe i përket bashkëshortes së njërit prej autorëve.
Pas vrasjes, autorët janë larguar me shpejtësi, por pasagjeri në derën e pasme për një moment nuk ka mundur të futet dhe mjeti është ndaluar sërish.
Pas rreth 1 kilometër nga vendi i ngjarjes dy bashkëpunëtorët Skedjan Gabrani dhe Elton Hajnaj kanë zbritur nga makina, ndërsa autori 44-vjeçar Hansi Jonuzaj ka ikur drejt Pyllit të Sodës, ku dhe është kapur nga policia.
Ai nuk e ka pranuar autorësinë e ngjarjes. Nga ana e saj, policia vijon kërkimet për kapjen e dy bashkëpunëtorëve në krim.
LEXO EDHE:
EMRAT+VIDEO/Kush janë dy personat e shpallur në kërkim për vrasjen e Taulant Gjikajt në Vlorë
