Nga Boldnews
Zyrtarët e Bashkimit Europian në Tiranë deklaruan se po presin sqarime nga kryeministri Edi Rama për marrëveshjen e nënshkruar me fondin financiar “EMAAR” të Dubait për shndërrimin e portit të Durrësit nga industrial në vend-ankorim jahtesh, për një vlerë 2 miliardë dollarë.
Përtej gjuhës së drunjtë, burokratët e Brukselit e bënë të qartë që nuk e mbështetin aspak këtë nismë të qeverisë “Rama”, e cila mund të bjerë ndesh me Marrëveshjen e Stabilizim-Asociimit (MSA) ndërmjet Shqipërisë dhe Bashkimit Europian, të nënshkruar në vitin 2006.
Ajo që Brukseli pret nga Rama është shpjegimet nëse marrëveshja e tij me grupin arab është apo jo në përputhje, sidomos me nenet 71 dhe 74 të MSA.
Në këto nene, qeveria e Tiranës ka marrë përsipër që të mos diskriminojë ose të mos krijojë pengesa për investime të mundshme të kompanive europiane në Shqipëri, në rast se ato shprehin interes për sektorë të ndryshëm në vendin tonë.
Në rastin konkret, qeveria e Ramës ka nënshkruar një marrëveshje për shndërrimin e portit të Durrësit në port jahtesh me një kompani jashtë Komunitetit Europian, ndërkohë që Brukseli kërkon që në raste të tilla të zhvillohen procedura të hapura, transparente dhe të mos ketë favorizime për kompani të ndryshme, aq më tepër ekstrakomunitare.
Qëndrimi i Brukselit për marrëveshjen me fondin “EMAAR” pritet ta vendosë në vështirësi kryeministrin Edi Rama, i cili u detyruar të japë publikisht detaje për projektin “2 miliardë dollarë”, vetëm pasi një shpurë zyrtarësh të tij u kapën “mat” duke darkuar në restorantin luksoz të Nusretit, në Dubai.
Pamjet video, ku shfaqeshin duke shqyer mish “Nusreti” të ministrave Arben Ahmetaj, Belinda Balluku, nënkryetarit të Bashkisë së Tiranës, Arbjan Mazniku, të biznesmenit Samir Mane e të tjerë shoqërues të tyre, e vendosën qeverinë e Edi Ramës në një pozitë të pafavorshme, vetëm pak muaj para zgjedhjeve.
Kryeministri Rama u mundua të justifikonte “luksin e Dubait” me faktin që zyrtarët qeveritarë po ndanin “një çapë bukë”, siç pëlqen ta përmendë Arben Ahmetaj, me drejtuesit e fondacionit “Emaar”, të cilët do të investonin 2 miliardë dollarë në Shqipëri.
Madje, sipas mediave pranë qeverisë, kjo marrëveshje “xhelozoi” edhe fqinjët, sidomos Greqinë, që shpresonte të merrte miliarda investime nga vendet arabe.
“Apologjia” e Ramës për ministrat dhe të tjerët, nxori në dritë ekzistencën e një marrëveshjeje për tjetërsimin e portit të Durrësit, e cila deri në atë kohë i ishte mbajtur e fshehtë opinionit publik.
Por, një marrëveshje Rama-“Emaar” ishte një patate e nxehtë, e cila nuk kaloi pa u vënë re nga Brukseli zyrtar.
Pas reagimit të funksionarëve të Bashkimit Europian, duket se nga Dubai do të mbetet vetëm “darka e Nusretit”.
