Pse disa njerëz kontraktojnë forma shumë agresive të Covid-19 ndërsa të tjerët janë asimptomatikë ose nuk sëmuren fare, duke qenë të ekspozuar ndaj të njëjtit virus?
Kjo është një nga pyetjet që shkencëtarët në Universitetin e Tor Vergata-s në Romë po përpiqen t’i përgjigjen në bashkëpunim me kolegët e tyre nga e gjithë bota, në besimin se kjo është një nga çështjet thelbësore për t’u adresuar në mënyrë që të mposhtim pandeminë.
Profesor i gjenetikës, Giuseppe Novelli, dhe ish-rektor i universitetit Romak, shpjegoi karakteristikat e studimit ku ka deklaruar se:-Që nga fillimi i urgjencës shëndetësore kemi vënë re që jo të gjithë sëmuren në të njëjtën mënyrë, ekzistojnë në të vërtetë persona asimptomatikë, ata që raportojnë simptoma të lehta dhe për fat të keq edhe ata që duhet të shtrohen në spital në kujdes intensiv dhe fatkeqësisht shpesh vdesin. Ajo që bën ndryshimin mund të jetë sasia e interferoneve të prodhuara nga trupat e njerëzve.”
Studimi i kryer nga shkencëtarët italianë në bashkëpunim me kolegët nga Universiteti Rockefeller në Neë York dhe institucione të tjera, të gjithë të mbledhur nën kujdesin e Konsorciumit Ndërkombëtar të Gjenetikës (Covidhge), synon veçanërisht kërkimin e njerëzve “rezistentë” ndaj virusit, ekzaminohet ADN-ja e tyre dhe kuptohet pse arrihet të shmanget sëmundja dhe infeksioni, ndërsa janë të ekspozuar qartë ndaj virusit.
Hulumtimi, në veçanti, u përqëndrua në ato persona që kanë qenë në kontakt shumë të ngushtë me koronavirusin, për shembull duke jetuar së bashku me një person të infektuar pa patur mjete mbrojtëse.
“Ne kemi kryer një studim shumë të rëndësishëm për të kuptuar pse ka ndryshime shpesh shumë të mëdha në mesin e njerëzve të ekspozuar ndaj të njëjtit patogjen, dhe kemi zbuluar se 10% e atyre që zhvillojnë forma të rënda të kovidit kanë një defekt gjenetik në prodhimin e interferonit, i cili është linja e parë e mbrojtjes që ne prodhojmë. Pa interferon është më e lehtë të sëmuresh rëndë “, shpjegoi profesor Novelli.
Prandaj hipoteza e shkencëtarëve është se disa individë ,pavarësisht nga mosha, janë në gjendje të prodhojnë sasi më të mëdha të interferonit, duke u treguar në të vërtetë imunë ndaj kovidit. Novelli shpjegon -: Ne po zgjedhim vullnetarë që dhurojnë ADN-në e tyre midis njerëzve që kanë qenë shumë të ekspozuar ndaj virusit por nuk janë sëmurë.
Më vonë do të shqyrtojmë aftësinë e tyre për të prodhuar interferon”. Ky është një hulumtim shumë ambicioz sepse mund të lejojë zhvillimin e barnave monoklonale dhe antivirale që janë shumë të efektshme kundër koronavirusit.