Monika Kryemadhi, kryetare e LSI-së, tha mbrëmjen e sotme në Opinion se për inceneratorin e Tiranës ka një seri shkeljesh.
Kryemadhi tha se referuar dokumenteve rezulton se për inceneratorin thuhet se përfitues është Qarku i Tiranës, ku përfshihen 5 bashki, ndërkohë që përgjigje ka kthyer vetëm Bashkia e Tiranës së drejtuar nga Erion Veliaj.
“Bashkia e Kamzës, Vorës apo Kavajës, pjesë e qarkut të Tiranës, nuk kanë kthyer asnjë përgjigje”, tha Kryemadhi, duke e cilësuar këtë si një shkelje.
Kryemadhi u shpreh se referuar dokumenteve zyrtare, ky koncension është kundërshtuar nga ish-ministri Ylli Manjani, por edhe nga ish-ministri i Financave, Arben Ahmetaj.
“Ahmetaj del në rregullat me letrat, e ka kundërshtuar deri në fund. Siç duket ka frikë, ndaj dhe ka dashur të jetë në rregull me letrat.
Letra e ndërtimit u dha dy vjet më vonë nga Kryeministri Edi Rama dhe kompanisë iu dha një bonus”, tha Kryemadhi. Ajo tha se një kontratë që vlen 400 mln euro, u negociua për 6 ditë, studimi i fizibilitetit u bë për 5 ditë, dhe leja e ndërtimit u dha pas 2 vjetësh, e firmosur nga Edi Rama.
Kryetarja e LSI akuzoi se në aferën e inceneratorit të Tiranës janë përfshirë Edi Rama, Engjëll Agaçi dhe Alqi Bllako, i cili sipas Kryemadhit, kërkonte nga Bashkia e Tiranës që të miratonte procedurat, ndërkohë që përfitues ishte qarku i Tiranës, që ka në përbërje disa bashki.
Kryemadhi tha se Bashkia e Tiranës i ka paguar inceneratorit 22 mln euro, ndërkohë që nuk ishte dhënë leje për ndërtimin.
“A mund të më thoni se si ka mundësi që një ndërtimi pa leje t’i jepen 22 mln euro? Kjo është skemë e pastër e pastrimit të parave”, tha Kryemadhi, duke shtuar se paratë u lëvruan 2 vite para miratimit të lejes së ndërtimit.