Mbërrijnë në Aeroportin “Nënë Tereza”, 15,210 doza të vaksinave Pfizer. Ndonëse në orët e pasdites, Ministria e Shëndetësisë e drejtuar nga Ogerta Manastirliu njoftoi se vaksinat do të vonoheshin me 24 orë, pra do të mbërrinin mbrëmjen e së martës, dozat e Pfizer kanë mbërritur në Rinas.
Por duket se Ministria e Shëndetësisë ose nuk ka pasur informacione të sakta, ose njoftimi se vaksinat do të mbërrinin të martën ka ardhur pasi Manastirliu nuk e dinte nëse Kryeministri Rama do të mbërrinte në kohën e duhur nga Brukseli në Tiranë, për të pritur vaksinat. Dhe nisur nga fakti se Rama ka shkuar në Rinas edhe kur bëhej fjalë për një cantë dore me vaksina, ai s’mund të mos ishte i pranishëm kur vinte një sasi prej mbi 15 mijë dozash.
Rama sot foli me tone optimiste lidhur me vaksinat, ndonëse e konsideroi një luftë të fortë tregtare.
“Shpresojmë që deri në verë ne të kemi realizuar vaksinimet masive dhe të kemi një verë të hapur me një rënie drastike të rasteve me Covid-19”, tha Rama.
Ai u shpreh se sot është marrë konfirmimi nga Pfizer për 30 mijë doza të tjera në prill. Kreu i qeverisë tha po ashtu se së shpejti ka një lajm të mirë, ndërsa shtoi se janë të konfirmuara edhe 14 mijë dozat e para nga Astra Zeneca përmes mekanizmit të Covax.
Ministria e Shëndetësisë dhe Mbrojtes Sociale informoi rreth orës 16:00 të së hënës se 15,210 dozat e vaksinave të kompanisë Pfizer do të mbërrijnë ditën e martë në Shqipëri.
“Sapo kemi marrë njoftim nga kompania dhe autoriteti përgjegjës për transportin e sigurt të vaksinës, se sasia e vaksinave Pfizer, e konfirmuar për të mbërritur mbrëmjen e sotme, shtyhet me 24 orë”, njoftonte Manastirliu.
