Zv.ministrja e Shëndetësisë, Mira Rakacolli, i ka hedhur përgjegjvsinë qytetarëve lidhur me rritjen e rasteve të Covid-19 në vend, ndërsa largon përgjegjësinë e institucioneve.
Transporti publik evidentohet si një nga vatrat më të rrezikshme të përhapjes së Covid-19, por për zyrtaren e Qeverisë Rama, janë qytetarët që duhet të zgjedhin oraret. Në fakt në një vend normal janë institucionet ato që ndërhyjnë për të vendosur rregulla, qoftë edhe duke shtuar numrin e automjeteve në qarkullim, apo disiplinuar oraret. Ose në rastet ekstreme, Qeveria duhet të paguajë kostot ekstra dhe të ofrojë zgjidhjen më optimale, duke pasur parasysh mbrojtjen e jetëve të qytetarëve.
Në një intervistë për Oranews, Rakacolli tha se përdorimi i urbanëve është një problem personal. Sipas saj, njerëzit duhet të zgjedhin orarin e përshtatshëm për të hipur në autobusë, dhe mundësisht të zgjohen një orë më parë në mëngjes në mënyrë që të shmangin oraret e pikut të lëvizjes.
“Nëse unë përdor transportin publik më ka vënë mua përpara edhe zgjidhjen e problemit .
Nëse unë më përpara po të shikoja një autobus plot, nëse do gjeja vend do futesha, tashmë duhet ta shikoj me një sy tjetër. Nuk duhet të hip në autobus, pra zgjedhja në radhë të parë është e imja, po mua kjo do më kondicionojë mungesën në punë sepse janë distanca të largëta. Atëherë do më duhet që të çohem më herët, do marr një autobus tjetër, do t’i jap kohë vetes që unë të zgjedh pak a shumë orën më të përshtatshme për të hipur në autobus, kur mundet që unë mos të shkoj në atë orën e fluksit dhe të mundohem ta respektoj. Ky është problem individual. Pastaj është edhe problemi që thatë ju, drejtuesi i autobusit. Ai që drejton autobusin ka një përgjegjësi për shëndetin publik sepse edhe kur janë dhënë lejet për të filluar transportin publik ka protokolle Covid”, tha ajo.
