Kryeministri Edi Rama u shpreh sot nga Berati se zyrtarizimi për hapjen e negociatave mes Shqipërisë dhe BE nuk ka ndodhur formalisht jo për fajin e Shqipërisë, por për shkak të Holandës.
I pyetur nga një qytetarët se ku jemi me procesin e integrimit të vendit, Rama tha se çelja e negociatave është zyrtarizuar, por tha se nuk ka ndodhur hapja formale ose aprovimi nga të gjitha shtetet.
“Integrimi, çelja e negociatave është e zyrtarizuar, por hapja formalisht, është aspekti i aprovimit nga të gjitha shtetet. Procesi niset me hapin formal të konferencës së parë ndërqeveritare”, u shpreh Rama.
Ai u shpreh se nuk beson se mund të ndodhë konferenca e parë ndërqeveritare pa u bërë zgjedhjet në Holandë.
“Pa u bërë zgjedhjet në Holandë, konferenca ndërqeveritare nuk do të ndodhë. Ka ndikuar edhe pandemia. Do jem ne Bruksel për pak ditë, do kem kontakt me të gjitha autoritetet”, sqaroi Rama.
Sipas tij, Shqipëria i ka bërë të gjitha detyrat, por procesi i integrimit varet nga shumë komponentë. Ai vuri në dukje se reformat duhen bërë jo se i kërkojnë amerikanët apo evropianët, por sepse i duhen vendit.
”Ne i kemi bërë të gjitha detyrat tona. Nuk është një proces që ecën vetëm teknikisht, varet nga shumë komponentë. Rëndësi ka që në të bëjmë tonat. I bëmë se na duhet ne”, sqaroi Rama.
Në fakt gjatë qeverisjes së Edi Ramës, Shqipërisë i janë shtuar kushtet nga 5 në 15, dhe këto kushte janë vendosur pikërisht nga Bundestagu gjerman dhe më pas janë pranuar edhe nga institucionet e BE, përfshi edhe Parlamentin Europian. Dhe duket se kushti kryesor për Shqipërinë mbeten zgjedhjet e 25 prillit, që duhet të plotësojnë standardet sipas OSBE/ODIHR.
