Ministrja e Shëndetësisë, Ogerta Manastirliu, nëpërmjet një reagimin në rrjetin social ka shprehur mirënjohjen për bluzat e bardha, në përballimin e pandemisë, por ka kërkuar ndihmën e qytetarëve për respektimin e masave.
“Mirënjohje për sakrificën, durimin e përkushtimin e të gjithë stafeve mjekësore që janë në vijën e parë të frontit, në përballje me Covid-19.
Koha e vështirë që po kalojmë na thërret për më shumë solidaritet, për t’i dhënë një dorë mjekëve e infermierëve kudo në Shqipëri, duke zbatuar rregullat anti-Covid për të këputur sa më shumë hallka në zinxhirin e infektimeve”, shkruan Manastirliu.
Edhe më parë, në mesazhet drejtuar qytetarëve u është kërkuar zbatimi i masave, duke ia hedhur përgjegjësinë atyre lidhur me përhapjen e pandemisë, ndërsa nuk u zbatua trinomi testo-gjurmo-trajto, sikundër OBSH i ka kërkuar secilit prej vendeve. Shqipëria renditet ndër vendet me numrin më të ulët të testimeve që nga koha e nisjes së pandemisë, ndërkohë që edhe në procesin e vaksinimit renditet sërisht ndër vendet e fundit, edhe pse Kryeministri Edi Rama është përpjekur që gjithë procesin e vaksinimit ta trajtojë si show dhe propogandë.
