Belind Këlliçi, një prej drejtuesve politikë të PD në Qarkun e Tiranës, është gjobitur me 50 mln lekë nga Policia e Shtetit, me pretendimin se ka shkelur rregullat anti-Covid.
Prej momentin kur Kryeministri Edi Rama kërkoi nga policia që të kontrollonte edhe takimet elektorale të partive politike lidhur me masat anti-Covid, disa politikanë të saj janë ndëshkuar me masa administrative. Dhe si për të treguar se gjobat nuk janë politike, mes atyre që janë gjobitur është edhe një ministër, Blendi Klosi.
Së fundmi, policia e Tiranës i ka vendosur një gjobë Belind Këlliçit. Ky i fundit ka publikuar fletën e gjobës, ku shkruan “Rama ik, edhe 66 ditë”.
“Kjo është gjoba 50 milionëshe për Opoziten!
Policia më ka gjobitur me pretendimin se kam shkelur fjalën-urdhër të kryeministrit, për organizim në mjedise të mbyllura me mbi 10 vetë.
Edi Rama i pari, dhe banda e tij me ne krye Veliajn, Spiropalin, Ballukun, po organizojnë takime me punonjës të administratës, me pjesëmarrje 100-200 vetë, ku Policia kujdeset vetë për organizimin, që nga vendosja e karrikeve deri te listë-prezenca e duartrokitësve.
Akti teatral i radhës ishte gjobitja ndaj Erion Veliaj. Komisioni i Ankimeve dhe Sanksioneve ka shfuqizuar dy dënimet me gjoba për Veliajn, sepse nuk ka konstatuar shkelje nga ana e Veliajt dhe ka shfuqizuar gjobat me 35 mijë lekë dhe 40 mijë lekë.
Gjobat janë vetëm për opozitën. Janë për këdo që i bën opozitë urdhërave të Ramës.
Keni edhe 66 ditë kohë per te vendosur gjoba antikushtetuese.
Pastaj ju pret 25 prilli”, shkruan Këlliçi.
