Gjatë 24 orëve të fundit në Pediatrinë Infektive janë shtruar 8 fëmijë të infektuar. Ndërkohë mësohet se dy nga fëmijët ndodhen në terapi intensive, në gjendje të stabilizuar, dhe jo të intubuar.
Sipas shifrave zyrtare, nga fillimi i pandemisë, janë prekur me koronavirus rreth 2 mijë fëmijë, 700 prej të cilëve në muajt janar-shkurt 2021.
Mbrëmjen e së mërkurës, në një prej emisioneve televizive, Gjeorgjina Kuli, pediatre, kërkoi nga prindërit të jenë të kundesshëm me simptomat që shfaqin fëmijët. Ajo vuri theksin se kryesisht në rastet e veçanta, por që paraqesin probleme, komplikacionet te fëmijët ndodhin edhe pas 1 muaji. Ajo tha se ka pasur raste të shfaqjes së asaj që njihet si sëmundja kavasaki dhe që ka lidhje me përgjigjen autoimune të fëmijëve ndaj Covid-19.
