Nga BoldNews.al
Gazra Teknike Shqiptare (GTS), një nga kompanitë e përmendura në përgjimet e anëtarëve të klanit mafioz italian “Ndragheta”, vijon të fitojë tendera pa garë në Shqipëri.
Monopoli i firmave të oksigjenit mund t’i ketë kushtuar dhjetëra miliona euro shtetit shqiptar, ku dy firmat e vetme që marrin pjesë në garë kanë një “marrëveshje” me njëra tjetrën.
“GTS-ja e Nikut” bashkëpunon herë pas here me MESSER Albagaz, ku në disa tendera futen si Bashkim i Operatorëve Ekonomikë (BOE).
Dhe, duke mos pasur konkurrencë, fitojnë tendera duke marrë edhe qindarkat e fundit. Sipas dokumenteve që disponon BoldNews, GTS dhe MESSER janë futur bashkë në disa procedura.
Në të tjerat janë futur veç e veç, por kurrë duke konkuruar njëra-tjetrën. Ka dyshime të forta se pas të dyja kompanive qendrojnë të njëjtët persona, ndërsa vetëm administratorët ndryshojnë.
Por, kur organet ligjzbatuese t’i zbulojnë këto lidhje, do të jetë shumë vonë. Arkat e shtetit po boshatisen dita-ditës, teksa edhe Autoriteti i Konkurencas “fle gjumë”.
BoldNews ka siguruar dokumentet e një tjetër tenderi, nga këta të freskët fare, ku fitues është shpallur GTS-ja e Besnik Halilit, i njohur si “Niku i Ndrag’hetës”, njëkohësisht edhe bashkëjetuesi i Luneda Sufalit, drejtoreshës së Shërbimit Social Shtetëror.
Drejtoritë e Spitaleve Rajonale kanë zhvilluar me dhjetëra tendera kohët e fundit. Natyrisht, vlerat më të mëdha kanë qenë në QSUT dhe Shefqet Ndroqi, por nuk kanë munguar edhe tenderat nga Spitalet Rajonale, nga Gjirokastra e deri në Kukës.
Në të gjjtha këto spitale, për furnizime me oksigjen janë shpallur vetëm dy firma fituese; GTS dhe Messer Albagaz.
Dhe, s’kishte si të ndodhte ndryshe edhe në Lezhë, ku sipas dokumentit të mësipërm ka marrë pjesë vetëm GTS-ja.
Sipas dokumenteve që disponon BoldNews, fondi për këtë tendër ka qenë 24.372.000 lekë pa TVSH (me TVSH rreth 250 mijë euro).
GTS e ma marrë me të gjithë fondin limit. BoldNews nuk është kundër furnizimit me oksigjen të spitaleve. Përkundrazi, të bëhen sa më shpejt të jetë e mundur.
Pasi një jetë e shpëtuar në këto spitale është më shumë sesa e gjithë reforma e dështuar e spitaleve.
Ajo që kemi zbuluar është se tenderat e bëra po diktohen nga lart. Drejtues të ministrisë së Shëndetësisë e kanë kthyer këtë pandemi në një biznes të mirëfilltë, ku të dëmtuar janë vetëm shqiptarët.
Këta të fundit, pasi po varfërohen dita ditës, pasi për shërbime spitalore po paguajnë shumë herë; sigurime shëndetësore, pagesa nën dorë në spitale, pagesa në spitale private, pagesa në farmaci e shumë e shumë të tjera.
