Pas vendimit të Komitetit të Ekspertëve, pjesa më e madhe e shkollave të larta nuk do t’i kthejnë studentët në auditore. Të gjithë fakultetet e Universitetit të Tiranës përfshirë dhe degët specifike të Ekonomisë dhe Shkencave të Natyrës, provimet do t’i zhvillojnë online.
Edhe Universiteti i Mjekësisë po sheh mundësinë e zhvillimit të provimeve në spitalet e rretheve nga janë studentët. Ndryshe nga degët e tjera, mjekësia 80% të lëndëve e ka praktikë në spital dhe pjesa tjetër teori.
“Do bashkëveprohet me Ministrinë e Shëndetësisë për të caktuar një mbikëqyrës klinik në spitalet përkatëse për t’i shpërndarë studentët. Mund të jenë dhe drejtorët e spitaleve që do t’i mbikëqyrin studentët sepse ata mund të ndihmojnë gjatë praktikës në përballimin e situatës së Covid-19”, tha Arben Gjata, rektor i Universitetit të Mjekësisë.
Rektori Gjata thotë se për studentët që nuk do të hyjnë në këto provime do të hapet një sezon i tretë. ”Ne mund të kemi nevojë për 1-2 javë zgjatje të vitit akademik, por mund të bëhet edhe si vitin e kaluar që u shty më shumë se një muaj dhe hapja të bëhet sërish muaj më vonë. Varet si do jetë situata, janë skenarë të ndryshëm që nuk i llogarisim dot sot”.
