Dy ditë pasi Kryeministri Edi Rama paralajëroi shtimin e masave kufizuese, pas shtimit të rasteve me Covid-19, dhe i kërkoi policisë që të ndërhynte, forcat e rendit kanë shtuar gjobat ndaj qytetarëve dhe bizneseve, që sipas tyre nuk respektojnë masat anti-Covid.
Së fundmi raportohet se dy administratorë të lokaleve në Divjakë janë ndëshkuar me gjobë për shkak se lejuan zhvillimin e aktiviteteve politike në kundërshtim me aktin normativ duke shkelur masat e Covid.
Mësohet se në këtë ambient janë organizuar takime elektorale nga përfaqësues të PD-së.
Ndërsa policia ka gjobitur shtetasen E. M., dhe shtetasin Sh. A., me masë administrative 1.000.000 lekë secilin prej administratorëve.
“Nga shërbimet e Komisariatit të Policisë Divjakë, pas konstatimit në rrjetet sociale se përfaqësues i një subjekti politik, në kundërshtim me Aktin Normativ, kishte organizuar dhe zhvilluar aktivitete duke krijuar grumbullime personash, në ambientet e dy lokaleve në Divjakë dhe në Çermë-Sektor, përkatësisht me administratore shtetasen E. M., dhe shtetasin Sh. A., ndëshkuan me masë administrative 1.000.000 lekë secilin prej administratorëve”, thuhet në njoftimin e policisë.
E ndërsa policia po tregohet e zellshme për të gjurmuar hap pas hapi përfaqësues të opozitës, që zhvillojnë takime në kuadrin e zgjedhjeve të 25 prillit, bie në sy fakti se kjo gjë nuk ndodh me përfaqësues të Rilindjes. Çdo ditë përfaqësues të Rilindjes zhvillojnë takime, madje në to marrin pjesë edhe anëtarë të Komitetit Teknik, ndërsa nuk ka njoftime nëse janë ndërmarrë masa administrative.
