Kryeministri Edi Rama, gjatë konferencën për shtyp në Rinas, foli dhe për çështjen e vaksinave ruse dhe kineze.
Kreu i qeverisë u shpreh se nuk ka asnjë paragjykim për vaksinat e këtyre dy vendeve, por se për momentin qeveria ka zgjedhur të ndjekë linjën e BE për këtë çështje.
Sipas Ramës, nëse BE do të ndryshojë qasje për vaksinat lindore, atëherë dhe Shqipëria do të rishikojë pozicionin e saj.
“Përsa i përket vaksinave lindore, ruse apo kineze asnjë paragjykim për aspektet shkencore, respekt për shkencëtarët, por zgjedhja jonë është të kërkojmë vaksina në krahun perëndimor të Shqipërisë.
Nëse BE do të hapet ndaj vaksinave kineze dhe ruse, ne do të rishikojmë qasjen. Përsa kohë BE është e mbyllur ndaj këtyre vaksinave, ne jemi në krah të tyre”, u shpreh Rama.
Më parë Kryeministri Edi Rama ka shprehur kritika të forta ndaj Bashkimit Europian pikërisht për çështjen e vaksinave, pasi sipas tij, Unioni nuk mendoi për vendet e Ballkanit Perëndimor. Gjithashtu Rama krijoi një përplasje me Ambasadën ruse në Tiranë, e cila i ofroi Shqipërisë vaksinën Sputnik. Por Kryeministri në reagimin e tij e quajti këtë një shaka, ndërsa shprehej i bindur se kishte siguruar dozat nga Pfizer.
