Ndërkohë kur numri i personave që humbin jetën nga Covid-19, vetëm sipas shifrave zyrtare, ka arritur shifrat më të larta të 11 muajve nga shfaqja e pandemisë, ministrja e Shëndetësisë, Ogerta Manastirliu, duket sikur jeton në një tjetër planet dhe flet për një situatë që ndodhet nën kontroll.
Vetëm sot 13 qytetarë, bazuar në shifrat e publikuara nga Ministria e Shëndetësisë kanë humbur jetën, ndërsa në dy javët e fundit, janë plot 112 persona të deklaruar zyrtarisht.
Megjithatë sërisht Manastirliu flet për një situatë që kontrollohet nga Ministria e Shëndetësisë apo struktura të tjera shëndetësore, ndonëse numri i testeve përgjatë 11 muajve kurrë nuk ka shkuar në 5 mijë të tilla.
Manastirliu u shpreh se pavarësisht numrit të lartë të infektimeve, situata në vend është e qëndrueshme dhe nën kontroll.
“Kemi një rritje të infektimeve e cila pavarësisht rritjes së incidencës kemi një situatë të kontrolluar. Numri i të shtruarve në spitale është i qëndrueshme. Lufta nuk ka përfunduar. Po vijojmë punën për fuqizimin e kapaciteteve. Nuk jemi në një moment për të vendosur masa të reja kufizuese.
Zbatimi i masave që kemi është me shumë rëndësi në këto momente. Qytetarët duhet të zbatojnë protokollet”, tha ajo.
Nuk dihet se çfarë mund të ketë parasysh ministrja e Shëndetësisë kur deklaron se ka situatën nën kontroll, por Shqipëria referuar numrit të popullsisë zë vendin e parë në Europë për jetët e humbura nga Covid, me një rritje të përllogaritur në +111% për muajt nëntor-dhjetor.
Dhe nëse misioni i strukturave shëndetësore është shpëtimi i jetëve njerëzore, atëherë këtu ministrja e Shëndetësisë, Komiteti Teknik i Ekspertëve dhe çdo strukturë tjetër vendimmarrëse ka dështuar totalisht.
