Kreu demokrat Lulzim Basha ka zhvilluar një takim me një çfit të sapomartuarish në Tiranë, të cilëve iu ka shpjeguar programin e prezantuar nga PD.
Basha e ka cilësuar largimin e të rinjve nga vendi si plagë kombëtare, të cilës duhet t´i jepet fund.
Ai tha se programi i PD parashikon për çdo fëmijë të porsalindur 3 mijë lekë të reja në muaj deri në moshën 5 vjeç, fond ky që sipas demokratëve do të ndihmojë këto familje. Gjithashtu Basha premtoi tekste shkollore falas për fëmijët, por edhe ngritjen e një sistemi ku edhe pasi mbaron orari shkollor fëmijët të kenë mundësi sipas sipas dëshirës së prindërve, të kenë mundësi të qëndrojnë dhe pas orëve të shkollës.
“Plani ynë, zerim i tarifës universitare për studentë që vijnë nga familje me të ardhura nën 640 mijë të vjetra në muaj”, tha Basha.
Sipas tij, plani i PD, është që vit për vit 5 mijë çifte të reja të përfitojnë nga shteti subvencionim 100% të interesave të kredive bankare.
“Partia Demokratike nuk bën premtime, por merr angazhime. Kemi dëgjuar këto 8 vite premtime, por asnjë nuk është mbajtur”, tha kreu demokrat.
Sipas tij, më 25 prill ose fiton Shqipëria ose fiton Rama, ndërsa shprehu bindjen se në zgjedhjet e ardhshme parlamentare, do të fitojë Shqipëria.
