“Nuk jemi në bunkerin e Enverit që të ndalojmë lëvizjen e lirë”, u shpreh Kryeministri Edi Rama nga Korça, duke iu përgjigjur në këtë mënyrë akuzave të opozitës së bashkuar dhe Presidentit, lidhur me shpopullimin e vendit.
Shqipëria bazuar në të dhënat dhe raportet ndërkombëtare ka regjistruar numrin më të lartë të kërkesave për azil në vendet e BE, por duket se kjo situatë nuk e shqetëson Ramën.
E ndërsa nga opozita, në takimet e zhvilluara në kuadrin e zgjedhjeve të 25 prillit, theksin është vënë pikërisht te krijimi i kushteve për të ndalur largimin e shqiptarëve, veçanërisht të të rinjve, Kryeministri thekson se kjo nuk është çështje as programe partish dhe as premtimesh.
“Ne nuk mund të ndalojmë lëvizjen e lirë, s´jemi në bunkerin e Enverit. Ne duhet të bëjmë akoma edhe më shumë për të rinjtë, por s´mund të pengojmë largimin e tyre”, tha Rama.
Në fakt të rinjtë që largohen nga Shqipëria zgjedhin këtë rrugë pasi nuk mund të sigurojnë një jetesë normale, nuk mund të gjejnë një vend pune apo të vijojnë studimet.Dhe të gjitha këto kanë të bëjnë me politikat që duhet të ndjekë Qeveria, e cila duhet të ofrojë shpresë.
