Kryekomisioneri Shtetëror Ilirjan Celibashi, i ka tërhequr vëmendjen qeverisë dhe kryebashkiakëve për të respektuar ligjin zgjedhor, i cili ndalon aktivitetet deri në 4 muaj para zgjedhjeve, duke përdorur asetet dhe burimet njerëzore për fushatë.
Celibashi u ndal në disa nga cështjet që po trajtohen nga ky institucion në më pak se tre muaj nga parlamentaret e 25 prillit.
Nëse sheh me optimizëm realizimin e identifikimit biometrik, kryetari i KQZ nuk kishte të njëjtën qasje për votimin elektronik dhe votën e emigrantëve. Krahas kësaj, KQZ ngriti edhe problematikën e votuesve brenda vendit pasi 800 mijë shqiptarëve u skadon dokumenti i identifikimit deri në 25 prill.
“Ndalohen të githa veprimtaritë që kanë të bëjnë me shpërndarjen publike të lejeve të legalizimeve apo të çdo lloj titulli pronësie, apo promovime të këtij karakteri. Vizitat apo promovimi i dhënies së çelësave të shtëpive apo banesave apo dokumenteve që pasqyrojnë fitimin e të drejtave nga qytetarët.
Instituticionet e vazhdojnë këtë punë, por nuk ka asnjë arsye që të tjerë që nuk kanë lidhje me këtë punë, të bëhen pjesë e veprimtarive publike. KQZ po shqyrton disa raste dhe besoj se në ditët në vijim do t’i trajtojë ato në seanca publike.
Sa i përket identifikimit biometrik jemi në fazën e negociatave me kompaninë që ka shfaqur interes për ta zhvilluar këtë. Kam besim se do të kemi një marrëveshje shumë shpejt, ndoshta javën tjetër do finalizohet.
Sa i përket numërimit elektronik jemi në bisedime me partitë, por duket qartë për zonën pilot ku do zhvillohet ky projekt. Për votën e emigrantëve po mundohemi të ngrejmë një sistem që të jetë i sigurt, por dhe të perceptohet si i tillë nga partitë politike dhe diaspora. Nuk është e thjeshtë sepse idetë janë të ndryshme”, u shpreh Celibashi.
