Ditët e fundit, ka patur një acarim të marrëdhënieve mes Bashkimit Europian dhe kompanisë AstraZeneca, lidhur me porositë që BE ka bërë për vaksinat anti-Covid.
Problemi ka lindur për faktin se kompania nuk do të mund të dorëzojë të gjitha dozat që BE kërkon brenda marsit, pasi ka patur disa probleme që kanë sjellë ngadalësim në prodhim. Sipas raportimeve, bëhet fjalë për 50 milionë doza më pak.
Ndërkohë Bashkimi Europian ka kërkuar që një pjesë e vaksinave të prodhuara në Mbretërinë e Bashkuar të dërgohen drejt Europës, për të përmbushur ato që i quajnë “detyrime kontraktuale”.
Megjithatë, nga Mbretëria e Bashkuar, sinjalet janë se vaksinimi i popullësisë do të vijojë sipas planit dhe nuk do të ketë ndonjë devijim të tij, për të çuar vaksina drejt BE-së.
Ministri Gove, u shpreh se MB do të bëjë “gjithçka që është e mundur” për t’u siguruar që vendet fqinj të vaksinohen, por se kjo mund të arrihet vetëm me “dialog dhe miqësi”.
Gjatë një interviste për BBC Radio 4, ministri u pyet nëse qeveria do të lejojë që vaksinat të shkojnë në BE. Ai u përgjigj “jo” dhe shtoi se vaksinat , “të cilat janë paguar dhe planifikuar do të vijojnë”.
Ky qëndrim i Mbretërisë së Bashkuar është i kuptueshëm, pasi ky vend ka investuar gjatë punës kërkimore për vaksinën në Universitetin e Oxford dhe e ka firmosur kontratën me AstraZeneca që në muajin maj, tre muaj përpara se BE të firmosë një kontratë, çka i jep prioritet në raport me BE-në.
Mbretëria e Bashkuar është një nga vendet që po vaksinon popullësinë me ritme të larta dhe renditet e treta në shkallë globale, pas Izraelit dhe Emirateve të Bashkuara.
Aktualisht janë vaksinuar mbi 7 milionë persona dhe objektivi është vaksinimi i 15 milionë qytetarëve deri në mesin e muajit shkurt. Më tej, MB planifikon t’i ofrojë dozën e parë të vaksinë të gjithë popullësisë deri në vjeshtën e vitit 2021.
Qeveria është përballur me kritika për shkak të numrit mjaft të lartë të fataliteteve, që kanë kaluar 100 mijë persona.
