Java e katërt e janarit rrit të infektuarit nga koronavirusi. Për epidemiologët kjo situatë ka ardhur si pasojë e ftohjes së motit dhe shkeljes së masave mbrojtëse, veçanërisht gjatë periudhës së ndërrimit të viteve.
Edhe pse nuk kemi të bëjmë me një valë tjetër të Covid-19 e as me pikun që u shënua në muajt nëntor-dhjetor, specialistët po vënë re rritje të pozitivitetit te grupmoshat 15-24 vjeç.
“Na takon ne, të gjithë komunitetit që të respektojmë distancimet dhe të evitojmë grumbullimet. Duket qartë se në disa zona këto respektohen dhe në disa zona të tjera, jo. Kujtojmë festat e fundvitit në zonat juglindore të vendit, ku dukej sikur nuk kishte asnjë problem. Pritej që dimri të sillte më shumë raste”, u shpreh mjeku Alimehmeti.
Por pavarësisht, rritjes së infektimeve, epidemiologu Ilir Alimehmeti tregon se këtë periudhë janë ulur shtrimet në spital dhe humbjet e jetës. Sipas tij, kjo ka lidhje me infektimet e moshave të reja dhe mungesën e shenjave klinike te kjo kategori.
“Pra nëse shkon infeksioni drejt moshave të reja normale dhe për spitalin do të ketë më pak nevojë. Fakti është që edhe pse shifrat janë konsistente, shifrat në spital janë të buta”, shtoi mjeku.
Alimehmeti është kundër vendimit të Komitetit Teknik për të mbajtur mbyllur shkollat e larta në të gjithë vendin. Sipas epidemiologut, të rinjtë nuk shkojnë në auditore, por mund ta përhapin virusin kur mblidhen së bashku në bare dhe lokale.
“Kemi kafenetë hapur dhe shkollat mbyllur që nuk është koherente. Në universitete ka një ambient më të sigurt seç është kafeneja”, tha Alimehmeti.
Nga fillimi i pandemisë, në të gjithë vendin, rezultojnë të prekur mbi 72 mijë persona dhe më shumë se 1300 kanë humbur jetën nga koronavirusi. /A2cnn/
