Veliaj, “Pazar” me Ndragheta? SPAK-u në gjumë dhe precedenti hetimor “Tahiri”

Nga Boldnews.al

Përgjimet e Anti-mafias së Katanzaros, ku persona të lidhur me \mafian Ndragheta flasin për dhënie rryshfeti për leje ndërtimi në bashkië e Tiranës së drejtuar nga Erion Veliaj, nuk kanë ngjallur asnjë lloj “kurioziteti” procedurial në Strukturën e Posaçme Anti-Korrupsion (SPAK), në Shqipëri.

Të paktën deri më tani, kur kanë kaluar më shumë se 72 orë nga publikimi i përgjimeve, nuk ka asnjë sinjal se prokurorët shqiptarë kanë nisur lëvizjet për të zbuluar se çfarë ka në dosjet e prokurorit Nikola Graterri për “pazaret” e mundshme korruptive në Shqipëri, por sidomos në Tiranë.

SPAK-u, një trupë e përzgjedhur prokurorësh, teorikisht e pavarur nga çdo lloj ndikimi politik dhe e ngritur posaçërisht për luftën kundër korrupsionit në nivele të larta dhe lidhjet e zyrtarëve me grupe kriminale, me shumë mundësi ka zgjedhur që të shuajë kuriozitetin njerëzor nëpërmjet publikimeve në media.

Ndërkohë që kanë të gjitha mundësitë që të jenë jo thjesht konsumatorë të lajmeve, por prodhues të hetimeve të mëdha, mbështetur edhe në përgjimet e realizuara nga Anti-Mafia e Katanzaros.

Një precedent të rëndësishëm e kanë. Dhe nuk ka ndodhur shumë larg në kohë.

Bëhet fjalë për reagimin e prokurorisë shqiptare në fund të vitit 2017, kur në media u publikuan përgjimet e prokurorisë së Katanias për grupin kriminal Habilaj dhe lidhjet e tyre me ish-ministrin e Brendshëm, Saimir Tahiri.

Në 17 Tetor 2017, në Shqipëri u publikuan pjesë nga përgjimet e dosjes së Anti-Mafias italiane kundër grupit të narko-trafikantëve, të drejtuar nga Moisi Habilaj.

Në ato përgjime rezultonte edhe emri “Saimir”, për të cilin autoritetet italiane ishin të bindur se bëhej fjalë për Saimir Tahirin.

Menjëherë pas publikimit të këtyre përgjimeve, Prokuroria shqiptare, nëpërmjet Prokurorisë për Krime të Rënda, u vunë në kontakt me homologët e tyre italianë.

LEXO EDHE  Berisha publikon denoncimin: Balla kompani me Mond Begon, i dha tender 2.5 mln euro

Kërkesa ishte specifike-kërkoheshin të dhënat e prokurorëve italianë, për të kryer hetime në Shqipëri.

Fashikujt e përgjimeve erdhën në Shqipëri brenda 12 orëve dhe nisi shqyrtimi i tyre.

Për hir të së vërtetës, në ndihmë të Prokurorisë erdhi edhe Ministria e Drejtësisë, e cila, në zbatim të detyrimeve proceduriale, vuri në dispozicion të hetimit, një trupë të gjerë përkthyesish.

Brenda një kohe rekord, shumë materiale italiane u përkthyen dhe u shërbyen prokurorëve të merrnin masa të menjëhershme.

Vetëm dy ditë pas publikimit të përgjimeve, saktësisht në 19 Tetor 2017, Prokuroria për Krime të Rënda kërkoi në Parlament autorizimin për arrestimin e deputetit Saimir Tahiri.

Paralelisht, një operacion i drejtuar nga Krimet e Rënda në Babicë të Vlorës mbrëmjen e po asaj dite, zbuloi rreth 4 tonë kanabis sattiva në bastionin e Habilajve.

Pra, vetëm dy ditë i mjaftuan Prokurorisë Shqiptare që t’i jepnin udhë një prej hetimeve më të rëndësishme të zhvilluar në vendin tonë në vitet e fundit.

Tashmë, çështja “Tahiri” ka hyrë në kanalet e drejtësisë dhe procese të tilla nuk janë të lehta për t’u mbyllur edhe në shtete më të zhvilluara.

Megjithatë, rasti “Tahiri” mund të shërbente si një precedent i rëndësishëm për SPAK-un, për të nisur hetime edhe në Shqipëri për dyshimet mbi lidhjet e Ndragheta-s me lejet e ndërtimit në Tiranë.

Por, ky precedent duket se nuk është përthithur nga trupa e prokurorëve të përzgjedhur shqiptarë.

Ndoshta, duhet ajo që në rrjete sociale përmendet ironikisht këto orë- “SPAK të bëj pushim, pasi punën e saj e mbulon Antimafia e Katanzaros”.