FOTO/ Arrestohen dy persona të dyshuar për grabitje të armatosur

Dy persona janë arrestuar nga policia e Prishtinës në kuadrin e operacionit “Dorëza”, ndërsa akuzohen për grabitje me armë.

“Specialist për hetimin e rasteve të grabitjeve të mbështetur edhe nga njësi tjera të specializuara konkretizuan punën e tyre hetimore e cila rezultoi me arrestimin e dy të dyshuarve për të cilët dyshohet me bazë të jenë përfshirë në grabitjen e armatosur më datë 20.01.2021 në rrugën “Gustav Majer” në Prishtinë, ku nën kërcënimin e armës kishin grabitur një vlerë të konsiderueshme parash nga një biznes farmacie”, thuhet në komunikatë.

Sipas policisë, arrestimi u krye në rrugën “Rrustem Statovci” në Prishtinë, përderisa policët e përfshirë në operacion pas një hetimi paraprak ndaluan veturën Audi A3, me targë Kosove, me të cilën po qarkullonin të dyshuarit, M. K, mashkull, 21 vjeç, si dhe K. M, mashkull, 20 vjeç, shtetas i Republikës së Kosovës, të cilët menjëherë u arrestuan nga ana e policisë.

LEXO EDHE  Bardhi: Tregtarët nuk shtojnë xhiron, por listat e borxheve. PD do rrisë ndihmën ekonomike

Ndërkohë që policia ka ushtruar kontrolle të detajuar ndaj të dyshuarve dhe veturës ka arritur të gjejë dhe të sekuestroj edhe një revole, model i veçantë, dy kapele maskë, një palë doreza, si dhe sende të tjera të cilat nga hetimet e kryera nga ana e policisë dyshohet të jenë përdorur në rastet që janë hetuar.

Pas arrestimit janë kryer edhe tri operacione në tri lokacione të ndara, dy nga to në rajonin e Mitrovicës dhe një ne Prishtinë. Nga kontrollet e ushtruara janë gjetur dhe sekuestruar edhe një sasi substance narkotike (dyshohet të jetë e llojit Kanabis), një thikë, dy maska, dy shufra metalike, si dhe, një palë tuta sportive dhe një pallto (që dyshohet të jenë përdorur në rastet që po hetohen).