Nënkryetari i LSI, Petrit Vasili, u shpreh sot se vota e 25 prillit është një fuqi e jashtëzakonshme për të mbrojtur Shqipërinë dhe veten nga grabitqarët e Dubait.
Referuar darkës së ministrave të Ramës në restorantin luksoz në Dubai, Vasili tha se Qeveria shqiptare haptas demonstronte oreksin e saj të pashembullt për të ndarë Shqipërinë.
“Pas tenderëve të pafund sekretë, u arrit dhe sigurisht procedurave të pafund të prokurimit të paracaktuar përfitues, kulmi arrin kur edhe marrëveshjet ndërkombëtare bëhen praktikisht me emra dhe mbiemra, me prona të përcaktuara dhe me shpronësim individual të shqiptarëve. Pra, shqiptarëve u merret prona e tyre private. Është fare e qartë që kjo qeveri e ndan Shqipërinë si të jetë malli i saj dhe sikur ata të jenë pronarët e saj dhe jo administratorët e saj.
Në darkën e famshme të Dubait, kushdo që ka qenë i pavëmendshëm, ka kujtuar se ka parë gjellë në tavolinë, por është e kundërta. Në tavolinën e Dubait menyja ka qenë Shqipëria. Një antipastë ka qenë saktësisht Durrësi dhe qindra hektarë përqark tij.
Një pjatë kryesore biftek ka qenë Vlora, Saranda e Ksamili. E për ta mbyllur ëmbëlsira ka qenë Përmeti. Projekte të shkruara në marrëveshje, e cila sikurse janë dakordësuar bashkë-hajdutët e qeverisë dhe të Parlamentit është e tillë ku për të gjithë këto projekte, nuk do ti nënshtrohen thonë prokurimit publik, nuk do ti nënshtrohen tenderit publik, nuk do ti nënshtrohen procedurës konkurruese publike dhe as një procedure tjetër”, tha Vasili.
Ai tha se të gjithë qytetarët nuk duhet të jenë as të dëshpëruar dhe as të mërzitur e pashpresë, pasi kanë një dorë një fuqi të jashtëzakonshme, që është vota e tyre e 25 prillit ku ata kane mundësinë e pakthyeshme e të madhe për të mbrojtur Shqipërinë por dhe veten.
“25 prilli është arma për të mbrojtur Shqipërinë nga grabitja që po i bëhet pafund asaj por dhe për të mbrojtur veten pasi çdo pronë dhe çdo e drejtë është tashmë e rrezikuar dhe në duart e këtyre grabitqarëve të pangopur të cilët shesin e blejnë pa principe çdo gjë e për të cilën Shqipëria ka vlerë vetëm për xhepin e tyre, janë gati tua rrëmbejnë çdo gjë shqiptarëve. Mos harroni asnjëherë, 25 prilli është dita për të mbrojtur Shqipërinë dhe veten”, theksoi Vasili.
