Autoritetet indoneziane thonë se kanë gjetur vendin ku besojnë se aeroplani i pasagjerëve Boeing 737 u rrëzua në det menjëherë pas ngritjes nga kryeqyteti i vendit Xhakarta. Avioni Sriwijaya Air kishte 62 persona në bord kur u zhduk nga radari katër minuta pasi nisi udhëtimin e tij për në Pontianak në provincën Kalimantan Perëndimore.
Të Dielën, janë gjurmuar sinjalet që mendohet të jenë nga regjistruesi i fluturimit të avionit. Më shumë se 10 anije janë vendosur tani në vend me zhytësit e marinës. “Ne kemi zbuluar sinjale në dy pika, kjo mund të jetë kutia e zezë,” tha shefi i agjencisë së kërkimit dhe shpëtimit në Indonezi, Bagus Puruhito.
Hetuesit po analizojnë gjithashtu sende që besojnë se janë rrënoja të avionit, duke përfshirë një rrotë dhe pajisje të tjera që mund ti përkasin avionit. Një zëdhënës i policisë së Xhakarta, Yusri Yunus, tha se dy çanta ishin marrë nga agjencia e kërkimit dhe shpëtimit.
“Çanta e parë përmbante sendet personale, një çantë tjetër përmbante rroba të pasagjerit”, u tha ai gazetarëve, duke shtuar: “Ne jemi ende duke identifikuar këto gjetje.”
