Një zjarr i rëndë ka shpërthyer në një azil pleqsh në ishullin indonezian Kelibia, duke shkaktuar vdekjen e 16 personave dhe plagosjen e tre të tjerëve.
Sipas autoriteteve lokale, ngjarja ndodhi mbrëmjen e së dielës, ndërsa shumica e të moshuarve ndodheshin në dhomat e tyre.
“Kemi 16 viktima dhe tre persona të plagosur që kanë pësuar djegie,” deklaroi Jimmy Rotinsoulou, duke shtuar se shumë nga viktimat u gjetën brenda dhomave ku po pushonin.
Autoritetet arritën të nxjerrin gjallë 12 persona, të cilët u transportuan me urgjencë drejt një spitali aty pranë për të marrë ndihmë mjekësore.
Mediat e huaja raportojnë se zjarret vdekjeprurëse janë të shpeshta në Indonezi, një arkipelag me mbi 17 mijë ishuj, ku shpesh ndërtesat nuk përmbushin standardet e sigurisë.
Kujtojmë se më herët gjatë këtij muaji, një zjarr në një ndërtesë shtatëkatëshe në kryeqytetin Xhakarta la të paktën 22 persona të vdekur. Ndërsa në vitin 2023, të paktën 12 persona humbën jetën pas një shpërthimi në një fabrikë përpunimi nikeli në lindje të vendit.
