Shqipëria do të bashkëpunojë me Turqinë edhe sa i përket sigurimit të vaksinave anti-covid. Është kjo një ndër marrëveshjet e nënshkruara sot në Ankara mes dy qeverive sa i përket fushës së shëndetësisë.
Turqia gjatë ditëve të fundit ka nënshkruar kontrata për furnizimin me vaksina me Rusinë dhe Kinën, ndërkohë që kryeministri Edi Rama në konferencën e fundvitit për shtyp të mbajtur më 29 dhjetor e refuzoi publikisht ofertën e Rusisë për të bërë marrëveshje për blerjen e vaksinës ruse “Sputnik V”.
Në marrëveshjen e sotme nuk jepen detaje se për vaksinat e kujt kompanie do të bashkëpunojnë Qeveria shqiptare dhe ajo turke.
Ambasada e Rusisë në Tiranë i bëri një ofertë publike drejtorit për Media të Ramës, Endri Fuga, duke thënë se Rusia ishte e gatshme të negocionte për vaksinën e saj “Sputnik V” me Shqipërinë.
Një ditë pas kësaj, Edi Rama e quajti ofertën e bërë nga Ambasada Ruse në Tiranë, si “provokim qesharak”, ndërsa bëri me dije se Shqipëria është në bisedime me tre kompanitë më të njohura për vaksinën, Pfizer, AstraZeneca dhe Moderna, kompani me të cilat sipas kryeministrit janë të lidhura dhe shtetet europiane.
