Shumë shtete po konkurrojnë se cila ka vaksinën më efikase ndaj Covid. Gjigantët farmaceutikë nga SHBA, Gjermania, Britania e Madhe, Rusia, Kina, por edhe India kanë zhvilluar secila vaksinën e tyre.
Në fjalimin e tij pa shumë diplomaci, Dharmendra Pradhan, ministri i naftës dhe gazit natyror të Indisë tha se vaksinat e koronavirusit të krijuara në vendin e tij janë një “arritje e veçantë” e farmaceutikës indiane.
Ai tha se ata që shqetësohen për efikasitetin e tyre dhe “nuk kanë besim te shkencëtarët dhe fuqia e Indisë”, kanë “sfida mendore”.
“Disa njerëz me sfida mendore nuk përmirësohen kurrë, veçanërisht disa në udhëheqjen e Kongresit të cilët mundohen të gjejnë gabime në gjithçka,” tha ai duke refuzuar kritikat nga brenda parlamentit të vendit për besueshmërinë e vaksinës.
Të dielën India dha aprovimin e emergjencës për vaksinën e saj Covishield, e krijuar nga instituti vendas Serum, bazuar në modelin e vaksinës AstraZeneca/Oxford, ashtu si dhe për vaksinën Covaxin, të krijuar nga kompania indiane e farmaceutikës Bharat Biotech.
Covishield besohet të jetë diku te 62-për qind efektive.
Reagimi i tij erdhi pasi disa politikanë indianë kanë qenë më ekstremë, siç ishte kreu i partisë Samajëadi (Socialiste), Ashutosh Sinha, që tha se vaksina përmban “diçka për të shkaktuar dëm ose impotencë, për reduktimin e popullatës”.
India është vendi i dytë më i madh për nga popullsia pas Kinës në botë dhe një ndër më të prekurat nga Covid-19.
