Mes Presidenti Ilir Meta dhe kryeministrit Edi Rama janë shkëmbyer replika përmes rrjeteve sociale të cilat në thelb kanë investimet në Vlorë, konkretisht për rrugën Vlorë-Orikum. Ndërsa presidenti është shprehur se nuk ka firmosur marrëveshjen e huasë me Fondin Saudit për Zhvillim për shkak të mungesës së informacionit financiar, kryeministri Rama shprehet se Meta e bën qëllimisht.
Sipas Ramës, Meta bllokon prej muajsh autorizimin formal për marrjen e financimit të siguruar nga Fondi Saudit me argumentin se investimet janë selektive.
Ndërkohë më herët presidenca sqaroi se shkelja qëndron në faktin se nuk është respektuar procedura kushtetuese dhe ligjore për t’u pajisur me autorizim nga Presidenti, për të negociuar termat financiarë të kësaj marrëveshje huaje.
Reagimi i kryeministrit
Ilir Meta thotë se realizimi i një projekti të hartuar prej kohësh për infrastrukturën turistike të Vlorës qenka “qëllim selektiv elektoral”, prandaj ai e mbaka bllokuar prej muajsh autorizimin formal për marrjen e financimit të siguruar nga Fondi Saudit! Të qash e të qeshësh!
Projekti gati, financimi gati, por ndërhyrja transformuese përgjatë segmentit Vlorë-Orikum dhe banorët, sipërmarrësit, turistët e asaj zone duhet të presin Ilir Metën! Kam pritur me durim e do presim edhe pak që IM të lexojë sqarimet që i kemi nisur, para se të flasim me Vlorën!
