Nënkryetari i LSI-së, Petrit Vasili, e cilësoi një akt të shëmtuar dhe të paprecedentë, largimin nga puna të mjekut të Urgjencës së QSUT, Ilir Allkja.
Vasili shprehet se Allkja u largua nga puna jo se nuk kishte dedikim në kryerjen e detyrës, as se nuk kishte profesionalizëm, as për sjelljen ndaj pacientëve dhe familjarëve të tyre se dhe kjo është shembullore, por largohet sipas nenit të agjitacion dhe propagandës se paska bërë vërejtje dhe paska kërkuar që të përmirësohen kushtet e trajtimit të të sëmurëve dhe mënyra e punës ndaj qytetarëve dhe pacientëve që kanë problemet me Covid.
“Mjekët jo vetëm që nuk mbështeten, nuk ndihmohen, por stigmatizohen për të vërtetat që thonë. Praktikisht rasti i doktor Ilir Allkjas është një betejë e jashtëzakonshme e vërtetë ndërmjet dimensionit thelbësor, ajo e cila mban demokracinë në këmbë, pra thënies së të vërtetave me qëllim që ato të përmirësohen dhe të ndreqen dhe shtypja apo asfiksimi i çdo të vërtete nga Edi Rama, vetëm e vetëm që këto të vërteta mos të dalin.
Edi Rama jeton vetëm me mashtrime të shifrave dhe fakteve, pavarësisht se humbasin jetë njerëzish. Jeta e njerëzve nuk e preokupon fare. Nga dje në pardje shifrat e pandemisë lëvizin me 80%,. Në datën 28 nëntor u bënë vetëm 1500 testime, duke i ulur ato 45% dhe kishte vetëm 313 raste të reja. Një ditë më pas, pas kritikave tona shumë të forta, testimet u rritën dhe shkuan 2600, e numri i të infektuarve u rrit me 80%.
Është fare e qartë që e gjithë pandemia ishte një provë e shëmtuar se si një Kryeministër përpiqet të manipulojë, përpiqet të fshehë duke harruar e duke bërë më të shëmtuarin e akteve që mund të bënte një njeri, që të luajë me jetën e njerëzve. Çdo shifër e fshehur, çdo mbyllje e gojës së të vërtetës për të qenë më mirë e për t’u zgjidhur më mirë do të thotë jetë dhe shëndet njerëzish”, tha Vasili.
Sipas tij, Ilir Allkja dhe tërë mjekët e tjerë intelektualë nuk janë vendosur në këtë krah, por janë vendosur në krahun e pacientit, të të sëmurit, të pacientit dhe duan ta mbrojnë duke thënë të vërtetën, se mos marrja e masave mbrojtëse ka shkaktuar që edhe qendra më e madhe spitalore universitare të humbasë vetë mjekë, mjekë të shkëlqyer pasi mungesa e madhe e këtyre masave, mjeteve mbrojtëse, dezinfektimeve masive, barna me bollëk e të tjera, ato që donte kjo pandemi, nuk u morën kurrë.
“25 prilli patjetër ka për të qenë grushti më i rëndë, një grusht vdekjeprurës për tërë këtë skotë, këtë tufë të Rilindjes, e cila e urren demokracinë, do të fshehë të vërtetën, fjalën e lirë, gojën e njerëzve dhe njëherazi do të vazhdojë të ecë në pandëshkueshmërinë, pra të bëjë zullume, të fshehë të vërteta, të rrëmbejë para, të rrëmbejë koncesione, t’u mbyllin gojën njerëzve dhe të mos ndëshkohen.
Pra, kjo ditë është shumë e afërt dhe shembulli i Ilir Allkjas që dënohet jo për dedikimin dhe përkushtimin, por se tha të vërtetën, është një shembull i cili duhet të jetë në mendjen e të gjithëve si një reflektim i fortë për 25 prillin që na pret”, tha Vasili.
