Prokuroria e Pesaros ka rihapur çështjen e vrajses së shqiptarit 17-vjeçar Ismail Luli i ekzekutuar në mënyrë makabre nga dy bashkatdhetarët Marjo Mema e Igli Meta, të dënuar nga Gjykata e Apelit të Ankonës me burgim të përjetëshëm.
Për prokurorët italianë, bashkëfajtore në vrasjen e Lulit, është dhe 24-vjeçarja Ambra Saliji, ish e dashura e Igli Metës.
Me vendimin e marrë pak orë më parë, pozicioni i saj ka ndryshuar, nga dëshmitare në procesin ndaj dy shqiptarëve, në person nën hetim me akuzën e bashkëpunimit në vrasjen e viktimës. Sipas prokurores Irene Lilliu, Ambra Saliji ka ndihmuar në futjen në kurth të viktimës dhe ka pranuar që Igli Meta e Marjo Mema mund t’i bënin keq.
Ambra Saliji do të vihet në gjykim si bashkëfajtore në vrasje, lajm ky që nëna e Ismail Lulit e ka komentuar se “më në fund do të mund të marr vesh se çfarë kërkonin nga Ismaili e pse Ambra e futi në kurth”.
“Gjykimin e Ambra-s si fajtore në krim, e kemi kërkuar vite më parë me avokatët”, ka deklaruar ajo.“Këmbëngulëm shumë dhe pas arkivimit të çështjes, më në fund na u pranua.”
Krimi ka ndodhur më 19 korrik të 2015 në komunën Sant’Angelo in Vada në provincën e Pesaro Urbinos. 17 vjeçari u torturua i lidhur në një kryq në një zonë të izoluar të qytezës dhe u ekzekutua në mënyrë makabre me një prerje të thellë në fyt.
Motivi i këtij krimi, sipas hetimeve, ishte xhelozia e Igli Metës me dyshimin e një flirti mes Ismail Lulit e të fejuarës së tij Ambra. Gjykata italiane ka njohur si ekzekutues të krimit shqiptarin Igli Meta e si bashkëpunëtor e bashkëautor të plotë në vrasje, mikun e tij Marjo Mema.
Në shkallën e parë të gjykimit, Igli Meta u dënua me burgim të përjetshëm e Marjo Mema me 28 vite e 4 muaj burg.
Por Gjykata e Apelit të Ankonës, në vitin 2018, ndryshoi vendim duke i dhënë burgim të përjetshëm të dy autorëve të këtij krimi.
