Riciklim i të korruptuarve, e ka cilësuar Sekretari i Përgjithshëm i PD-së, Gazmend Bardhi, ndryshimet në kabinetin qeveritar, ku Olta Xhaçka merr postin e ministres së Jashtme, ndërsa Niko Peleshi rikthehet në Qeveri, si ministër i Brendshëm.
Bardhi shprehet se këto nuk janë ndryshime në qeveri, por riciklim i të korruptuarve për shkak të luftës mes klaneve në pushtet.
“Edi Rama është i lodhur, i vjetëruar, pa ide, pa ekip dhe i pafuqishëm për të ndaluar këtë luftë që dobëson ekonominë për interesa privatë. Në vend që të ndihmojë financiarisht dhe të rrisë punësimin për shqiptarët, Rama u siguron punë vetëm miqve të tij.
Edi Rama është një dështim. Ai është i paaftë të ndryshojë gjërat dhe vazhdon të bëjë keq e më keq. Vendit nuk i duhen arnime të vjetëruara, por i duhet ndryshim. Prej 8 vitesh Edi Rama ka ofruar veç dështime dhe një qeveri që kujdeset vetëm për veten.
Mjaft më! Është koha për të sjellë ndryshimin dhe shpresë të re në Shqipëri. Është koha për të zgjedhur një qeveri që kujdeset për njerëzit, jo për veten e saj”, shkruan Bardhi në rrjetin social.
Ndryshimet në kabinetin qeveritar u njoftuan nga Kryeministri Edi Rama në Twitter. Në 10 ditëshin e parë të dhjetorit, Rama u detyrua të ndryshojë ministrin e Brendshëm, Sandër Lleshajn, pas vrasjes së një të riu nga një efektiv policie, ndërsa në vend të tij u emërua Bledi Çuçi. Pozicionin e këtij të fundit si ministër i Bujqësisë, e mori Milva Ekonomi.
