“Greqia është në të drejtën e saj, ndaj Qeveria nuk ka çfarë të reagojë”, u shpreh Kryeministri Edi Rama, duke komentuar në këtë mënyrë debatin e nisur në Tiranë, pas dekretit nga autoritetet greke, që i jep të drejtën vendit fqinj për të zgjeruar kufirin detar me 12 milje në detin Jon.
Por kjo nuk e ndali Ramën që që sulmojë të gjithë kritikët e tij, përfshirë Presidentin, opozitën e bashkuar, apo edhe forcat politike në Prishtinë, që sipas tij po “i fryjnë këtij zjarri” në mënyrë të qëllimshme për të krijuar trazira të tjera përpara zgjedhjeve.
“Ata që i fryjnë këtij zjarri, janë të qëllimshëm. Qoftë nga Lalzi, qoftë nga presidenca qoftë nga Prishtina. Janë të qëllimshëm. E kam të vështirë të besoj që këta fryrës të jenë kaq të mangët nga mendja e kokës. Por kjo që bëjnë për mua është e qëllimshme, për të luajtur me ndjenjat kombëtare, me ndjeshmëritë, patriotike, për të shfrytëzuar rastin, që të krijohet një sebep për sherr, e për t’i ndarë punët mes tradhtarësh e patriotësh”, tha Rama.
Në vijim ai tha se Shqipëria në vitin 1990 ka bërë të njëjtën gjë që po kërkon të bërë Greqia sot.
“Shqipëria, në 1990 ka bërë atë që bën Greqia sot. E kam shpjeguar, sipas konventës ndërkombëtare të detit, çdo shtet, ka që dalje në det, ka të drejtën të zgjerohet 12 milje përtej kufirit ekzistues. Të njohur më parë, aty ku është e mundur. Shqipëria e ka ushtruar këtë të drejtë në ’90 me një dekret të presidiumit të kuvendit popullor dhe e ka depozitur ushtrimin e kësaj të drejte në maj, në OKB. Nuk rezulton që Greqia në atë kohë të ketë bërë ndonjë reagim apo deklaratë. Joni është shumë më përtej pjesës sonë. Në pjesën tonë. Mes dy palëve nuk ka mundësi fizike për t’u shtrirë 12 milje të dyja vendet”, u shpreh Kryeministri.
